കോവിഡ്​: നെടുമ്പാശ്ശേരിക്ക്​ ഇതുവരെ നഷ്​ടം ഏഴുകോടി; കഴിഞ്ഞ വർഷം 204 കോടി ലാഭം

നെടുമ്പാശ്ശേരി: കോവിഡ്​ വ്യാപനം കാരണം കൊച്ചി രാജ്യാന്തര വിമാനത്താവള കമ്പനി (സിയാൽ)ക്ക് ഈ സാമ്പത്തികവർഷം ​ ഇതുവരെ ഏഴുകോടി രൂപയുടെ നഷ്ടം. മഹാമാരിയുടെ പശ്​ചാത്തലത്തിൽ മാർച്ച്​ അവസാനം നിർത്തിവെച്ച വ്യോമഗതാഗതം ഇതുവരെ പൂർണതോതിൽ പുനരാരംഭിക്കാത്തതാണ്​ നഷ്​ടത്തിനിടയാക്കിയത്​.

വന്ദേഭാരത്​ മിഷനും ചുരുക്കം ചില ആഭ്യന്തര സർവിസുകളും മാത്രമാണ്​ ഇപ്പോൾ സർവിസ്​ നടത്തുന്നത്​. അതേസമയം കഴിഞ്ഞ സാമ്പത്തികവർഷം മാത്രം സിയാൽ 204 കോടിയുടെ ലാഭം നേടി. 810 കോടിയാണ് മൊത്തവരുമാനം. ഓഹരിയുടമകൾക്ക് ഇത്തവണ 27 ശതമാനം ലാഭവിഹിതം നൽകും. സംസ്ഥാന സർക്കാരിന് മാത്രം ലാഭവിഹിതമായി 34 കോടി രൂപ ലഭിക്കും.