മാസ്​കില്ലാതെ ഗ്രൂപ്​ ഫോ​ട്ടോ; 46 പേർക്കെതിരെ കേസ്

കാളികാവ് (മലപ്പുറം): ബ്ലോക്ക് പഞ്ചായത്ത് ഓഫിസ് കെട്ടിട ഉദ്ഘാടനത്തിനിടെ മാസ്ക്​ ധരിക്കാതെയും സാമൂഹിക അകലം പാലിക്കാതെയും ഫോട്ടോയെടുത്ത സംഭവത്തിൽ 46 പേർക്കെതിരെ പൊലീസ് കേസെടുത്തു. വ്യാഴാഴ്​ച കാളികാവിലായിരുന്നു കോവിഡ്​ പ്രേ​ാ​ട്ടോകോൾ ലംഘിച്ച്​ പരിപാടി നടത്തിയത്​. ഡി.വൈ.എഫ്​.ഐ നൽകിയ പരാതിയെ തുടർന്ന്​ കാളികാവ്​ പൊലീസാണ്​​​ കേസെടുത്തത്​​.

ഫോ​ട്ടോയിലുള്ള ബ്ലോക്ക് പഞ്ചായത്ത് പ്രസിഡൻറ്​ പി.ഖാലിദ്,​ ഭരണ സമിതിയംഗങ്ങൾ, ബി.ഡി.ഒ കേശവദാസ്​ എന്നിവരെ കേസിൽ പ്രതിചേർത്തു. കോവിഡ് വ്യാപന സമയത്ത് സുരക്ഷ മാനദണ്ഡങ്ങൾ ലംഘിച്ചവർക്കെതിരെ ശിക്ഷ നടപടി കൈക്കൊള്ളണമെന്നും പ്രദേശത്ത്​ ആരോഗ്യ പ്രശ്നങ്ങളുണ്ടാവാതിരിക്കാൻ ആരോഗ്യ വകുപ്പ് നടപടി കൈക്കൊള്ളണമെന്നും ഡി.വൈ.എഫ്.ഐ കാളികാവ് മേഖലാ കമ്മറ്റി ആവശ്യപ്പെട്ടു.