കോവിഡ്​: നിയന്ത്രണങ്ങൾ കർശനമാക്കും; ദിവസം രണ്ട്​ ലക്ഷം പരിശോധനകൾ നടത്താൻ നിർദേശം

തിരുവനന്തപുരം: സംസ്ഥാനത്ത്​ കോവിഡ്​ പരിശോധനകളുടെ എണ്ണം വർധിപ്പിക്കാൻ ആരോഗ്യമന്ത്രിയുടെ നിർദേശം. ദിവസം രണ്ട്​ ലക്ഷം പരിശോധനകളെങ്കിലും നടത്താനാണ്​ നിർദേശം. ആരോഗ്യമന്ത്രി വീണ ജോർജിന്‍റെ അധ്യക്ഷതയിൽ ചേർന്ന അ​വലോകന യോഗത്തിലാണ്​ ഇതുസംബന്ധിച്ച നിർദേശമുണ്ടായത്​.

പരിശോധന വർധിപ്പിക്കുന്നതിനൊപ്പം വാക്​സിനേഷനും കൂട്ടും. ആൾക്കൂട്ടം നിയന്ത്രിക്കുന്നതിനുള്ള കടുത്ത നടപടികൾ സ്വീകരിക്കാനും ആരോഗ്യമന്ത്രി നിർദേശം നൽകി. ഓണാഘോഷത്തിന്​ പിന്നാലെ സംസ്ഥാനത്ത്​ കോവിഡ്​ രോഗികളുടെ എണ്ണം വർധിക്കുമെന്ന്​ ആരോഗ്യവകുപ്പ്​ വ്യക്​തമാക്കിയിരുന്നു. വരുന്ന ആഴ്ചകളിൽ ചികിത്സയിലുള്ള രോഗികളുടെ എണ്ണം നാല്​ ലക്ഷം കടക്കുമെന്നാണ്​ വിലയിരുത്തൽ.

കഴിഞ്ഞ ദിവസം 13,383 പേർക്കാണ്​ കോവിഡ്​ സ്ഥിരീകരിച്ചത്​. 15.63 ശതമാനമായിരുന്നു ടെസ്​റ്റ്​ പോസിറ്റിവിറ്റി നിരക്ക്. 85,650 ടെസ്റ്റുകൾ മാത്രമാണ്​ കഴിഞ്ഞ ദിവസം നടത്തിയത്​.