ജയിലുകളിൽ കോവിഡ്​ വ്യാപനം രൂക്ഷം; 488 പേർക്ക്​ രോഗബാധ

തിരുവനന്തപുരം: സംസ്ഥാനത്തെ ജയിലുകളിൽ കോവിഡ്​ വ്യാപനം ശക്തം. വിവിധ ജയിലുകളിൽ തടവുകാരും ജീവനക്കാരും ഉൾപ്പെടെ 488 പേർക്ക്​ കോവിഡ് സ്ഥിരീകരിച്ചു. പൂജപ്പുര സെൻട്രൽ ജയിലിലാണ്​ രോഗവ്യാപനം രൂക്ഷം. കഴിഞ്ഞ മൂന്നുദിവസം 961 തടവുകാരെ പരിശോധിച്ചതിൽ 262 പേർക്ക് കോവിഡ് സ്ഥിരീകരിച്ചു. ഇവരെ പ്രത്യേക ബ്ലോക്കുകളിലേക്ക്​ മാറ്റി. കണ്ണൂർ സെൻട്രൽ ജയിലിൽ പത്ത്​ തടവുകാർക്കുകൂടി കോവിഡ്​ സ്ഥിരീകരിച്ചു. കോഴിക്കോട്​, കാസർകോട്​​ എന്നിവിടങ്ങളിൽ നിന്നെത്തിയ തടവുകാരിലാണ്​ രോഗം സ്ഥിരീകരിച്ചത്​.

കോവിഡ്​ വ്യാപനം ശക്തമാകുന്ന സാഹചര്യത്തിൽ എല്ലാ ജയിലുകളിലും തടവുകാർക്ക്​ കോവിഡ്​ പരിശോധന നടത്താൻ ജയിൽ മേധാവി നിർദേശം നൽകി​. മുമ്പ്​ കോവിഡ്​ വ്യാപനം ശക്തമായപ്പോൾ തടവുകാർക്ക്​ പരോൾ അനുവദിക്കുകയും പ്രായാധിക്യമുള്ളവരെ ശിക്ഷാ ഇളവ്​ നൽകി വിട്ടയക്കുകയും ചെയ്തിരുന്നു. എന്നാൽ, പരോൾ കാലാവധി കഴിഞ്ഞിട്ടും നല്ലൊരു വിഭാഗം മടങ്ങിയെത്തിയിട്ടില്ല. പരോൾ റദ്ദാക്കാനുള്ള നടപടി ചോദ്യം ചെയ്ത്​ ചിലർ കോടതിയെയും സമീപിച്ചിരിക്കുകയാണ്​.

പൂജപ്പുരയിൽ മാത്രം 250 പേർക്ക്​ രോഗബാധ

നേമം: തിരുവനന്തപുരം പൂജപ്പുര സെന്‍ട്രല്‍ ജയിലിലെ 250ഓളം തടവുകാര്‍ക്ക്​ കോവിഡ് സ്ഥിരീകരിച്ചു. കഴിഞ്ഞ ദിവസങ്ങളില്‍ തടവുകാര്‍ക്ക് ആന്റിജന്‍ പരിശോധന നടത്തിയിരുന്നു. ഫലം വന്നപ്പോഴാണ്​ ഇത്രയുംപേര്‍ പോസിറ്റീവായത്. സെന്‍ട്രല്‍ ജയിലില്‍ 1000ത്തോളം പേര്‍ വിവിധ സെല്ലുകളിലുണ്ട്. സാമൂഹിക അകലം പാലിക്കാന്‍ കഴിയാതെ വരുന്നതാണ് കോവിഡ് വ്യാപനത്തിന്​ കാരണമെന്നാണ്​ സൂചന.

പോസിറ്റീവായവര്‍ക്ക് ജലദോഷം, ചുമ, പനി എന്നിവയാണ്​ ലക്ഷണങ്ങള്‍. ഇവരെ അധികൃതര്‍ മാറ്റിപ്പാര്‍പ്പിച്ചിട്ടുണ്ട്. കോവിഡിന്റെ ഉദ്ഭവം എവിടെനിന്നാണെന്ന്​ വ്യക്തമായിട്ടില്ലെങ്കിലും ഒരാളില്‍നിന്ന്​ മറ്റൊരാളിലേക്ക് അതിവേഗ വ്യാപനമാണുണ്ടായത്. നിസ്സാര രോഗലക്ഷണങ്ങള്‍ ഉണ്ടായതോടെയാണ് ജയല്‍ അധികൃതര്‍ പരിശോധന നടത്താന്‍ തീരുമാനിച്ചത്.

ജയില്‍ ജീവനക്കാരിലേക്ക് രോഗവ്യാപനം ഉണ്ടാകുമോയെന്ന ആശങ്കയും ഉയർന്നിട്ടുണ്ട്​. പരമാവധി മുന്‍കരുതൽ സ്വീകരിക്കാനാണ് ജയില്‍ അധികൃതരുടെ തീരുമാനം. മറ്റ്​ ജയിലുകളിലും പരിശോധന വ്യാപിപ്പിക്കാന്‍ തീരുമാനിച്ചിട്ടുണ്ട്.