മതേതര ശക്തികളുടെ കൂട്ടായ്​മയെന്നാൽ തെരഞ്ഞെടുപ്പ്​ സഖ്യമല്ല -സുധാകർ റെഡ്​ഢി

മലപ്പുറം: ആർ.എസ്​.എസിനാൽ നയിക്കപ്പെടുന്ന ബി.ജെ.പിയാണ്​ രാജ്യത്തി​​​െൻറ മുഖ്യശത്രുവെന്നും അവരെ നേരിടാൻ വിശാല ഇടത്​ മതേതര ​െഎക്യം വേണമെന്നും സി.പി.​െഎ ജനറൽ സെക്രട്ടറി എസ്​. സുധാകർ റെഡ്​ഢി. മലപ്പുറത്ത്​ സി.പി.​െഎ സംസ്​ഥാന സമ്മേളനം ഉദ്​ഘാടനം ചെയ്യുകയായിരുന്നു അദ്ദേഹം.

മതേതര ശക്തികളുടെ കൂട്ടായ്​മയെന്നാൽ തെരഞ്ഞെടുപ്പ്​ സഖ്യമല്ലെന്നും അത്​ ഒാരോ സംസ്​ഥാനത്തും തെരഞ്ഞെടുപ്പ്​ സാഹചര്യത്തിന്​ അനുസരിച്ച്​ വ്യത്യസ്​തമാകുമെന്നും അദ്ദേഹം വ്യക്തമാക്കി. ജനാധിപത്യവും ഭരണഘടനയും ഭീഷണി നേരിടുന്ന സാഹചര്യത്തിൽ മതേതരകക്ഷികൾ ഒന്നിച്ചുനിന്ന്​ അത്​ സംരക്ഷിക്കണം. ഇടത്​ ​​െഎക്യം സുപ്രധാനമാണ്​. അതില്ലാതെ വിശാല മതേതരമുന്നേറ്റം സാധ്യമല്ല.

സംഘ്​പരിവാർ നേതൃത്വം നൽകുന്ന ഫാഷിസ്​റ്റ്​ ഭരണത്തിനെതിരെ വിവിധ ഭാഗങ്ങളിൽ നടക്കുന്ന പ്രക്ഷോഭങ്ങൾ ഏകോപിപ്പിക്കാൻ ജനപിന്തുണയുള്ള രാഷ്​ട്രീയ പ്രസ്​ഥാനങ്ങൾ ഒന്നിച്ചിറങ്ങണം. കോർപറേറ്റുകളുടെ സഹായത്തോടെ മാധ്യമങ്ങളെ വിലയ്​ക്കെടുത്ത്​ മികച്ച ഭരണമാണ്​ നടക്കുന്നതെന്ന പ്രതീതിയുണ്ടാക്കാനാണ്​ ശ്രമം നടക്കുന്നത്​. 75 ശതമാനം മാധ്യമങ്ങളും കോർപറേറ്റുകളുടെ പിടിയിലാണ്​. 

ഗോരക്ഷയുടെ പേരിൽ മാത്രം 30ലധികം പേർ കൊല്ലപ്പെട്ട രാജ്യമാണിത്​. അതിൽ 24 പേരും മുസ്​ലിംകളായിരുന്നു. ഇൗ ആൾക്കൂട്ടത്തെ നിയന്ത്രിക്കണമെന്ന്​ സുപ്രീംകോടതിക്ക്​ തന്നെ പറയേണ്ടിവന്നു. സാമൂഹിക വിരുദ്ധരാണിവരെന്ന്​ പ്രധാനമന്ത്രി നരേന്ദ്രമോദിയും ഒരു ഘട്ടത്തിൽ പറഞ്ഞു. എന്നാൽ, ആർ.എസ്​.എസ്​ മേധാവി മോഹൻ ഭാഗവത്​ അവർക്ക്​ വീരപര​ിവേഷം ചാർത്തിക്കൊടുത്തതോടെ പിന്നെ ആരും അനങ്ങിയില്ല.

യു.പി.എ സർക്കാറി​​​െൻറ നവ ഉദാരവത്​കരണ നയങ്ങൾ ഫാഷിസ്​റ്റ്​ പിന്തുണയോടെ നടപ്പാക്കുകയെന്നത്​ മാത്രമാണ്​ മോദി സർക്കാർ ചെയ്യുന്നത്. രാജ്യത്തി​​​െൻറ 71 ശതമാനവും അതിസമ്പന്നരായ ഒരു ശതമാനത്തി​​​െൻറ കൈവശമാണ്​​. മോദി അധികാരത്തിൽ വരു​േമ്പാൾ ഇത്​ 49 ശതമാനമായിരുന്നെന്നും സുധാകർ റെഡ്​ഢി പറഞ്ഞു. ബിനോയ്​ വിശ്വം പരിഭാഷപ്പെടുത്തി.