ഇടിമുറി വിവാദം: യൂനിവേഴ്സിറ്റി കോളജിലെ എസ്.എഫ്.ഐ യൂനിറ്റ് പിരിച്ചുവിട്ടു, നടപടി ഭിന്നശേഷിക്കാരനായ എസ്.എഫ്.ഐക്കാരന് മർദനമേറ്റതിന് പിന്നാലെ

തിരുവനന്തപുരം: തിരുവനന്തപുരം യൂനിവേഴ്സിറ്റി കോളജിലെ എസ്.എഫ്‌.ഐ യൂനിറ്റ് പിരിച്ചുവിടാൻ സി.പി.എം തീരുമാനം. ‘ഇടിമുറി’ വിവാദ​ത്തെ തുടർന്നാണ്​ ജില്ല സെക്രട്ടേറിയറ്റ് ചേർന്ന്​ തീരുമാനം കൈക്കൊണ്ടത്.

ജില്ലയിൽ എസ്.എഫ്‌.ഐയുടെ ശക്തികേന്ദ്രമാണ് യൂനിവേഴ്സിറ്റി കോളജ്. യൂനിവേഴ്സിറ്റി കോളജിലെ എസ്.എഫ്‌.ഐ പ്രവർത്തകരുടെ ഭാഗത്തുനിന്ന്​ പാർട്ടിക്കും സർക്കാറിനും കളങ്കമുണ്ടാക്കുന്ന പ്രവർത്തനങ്ങൾ ആവർത്തിക്കുന്ന പശ്ചാത്തലത്തിലാണ്​ പാർട്ടി ഇടപെട്ടത്​. പുതിയ അ​ഡ്​ഹോക്​ കമ്മിറ്റി രൂപവത്​കരിക്കാൻ എസ്​.എഫ്​.ഐ ജില്ല നേതൃത്വത്തിന്​ സി.പി.എം നിർദേശം നൽകി.

ഭിന്നശേഷിക്കാരനായ വിദ്യാർഥിയെ എസ്​.എഫ്​.ഐക്കാർ ഇടിമുറിയിലിട്ട്​ മർദിച്ചത്​ ഏതാനും ദിവസം മുമ്പാണ്​. മർദനമേറ്റ വിദ്യാർഥിയും എസ്​.എഫ്​.ഐക്കാരനാണ്​. ഇത്​ വിവാദമായതിനെ തുടർന്ന്​ നടത്തിയ അന്വേഷണത്തിൽ എസ്​.എഫ്​.ഐ യൂനിറ്റ്​ ഭാരവാഹികളടക്കം നാലു ​ വിദ്യാർഥികളെ പ്രിൻസിപ്പൽ സസ്​പെൻഡ്​​ ചെയ്തിരുന്നു.

കോളജിലെ അച്ചടക്ക സമിതി സമർപ്പിച്ച റിപ്പോർട്ടിന്റെ അടിസ്ഥാനത്തിലായിരുന്നു നടപടി. അതേസമയം, മർദനത്തിൽ പൊലീസിൽ പരാതി നൽകിയിട്ടും മെല്ലെപ്പോക്ക്​ നയമാണെന്ന്​ ആക്ഷേപവുമുണ്ട്​. അതിനിടെ, ഭിന്നശേഷിക്കാരനെ മർദിച്ച കേസിൽ സാക്ഷി പറഞ്ഞതിന്​ മറ്റൊരു വിദ്യാർഥിക്കും മർദനമേറ്റു. ഇതോടെയാണ്​ പാർട്ടി നടപടി.