സി.പി.എം പ്രകടനം അക്രമാസക്തമായി: ഒരാൾക്ക് കുത്തേറ്റു, മൂന്നുപേർക്ക് പരിക്ക്

ചെങ്ങന്നൂർ: ഹർത്താൽ ദിനത്തിൽ പ്രകടനം നടത്തിയ സി.പി.എം പ്രവർത്തകരെ ആക്രമിച്ചതിൽ പ്രതിഷേധിച്ച് ഞായറാഴ്​ച സി.പി .എം തിരുവൻവണ്ടൂരിൽ നടത്തിയ പ്രകടനത്തിൽ വ്യാപക അക്രമം. പ്രകടനം കടന്നുപോകവേ റോഡരികിലെ സ്‌റ്റോറിൽ നിൽക്കുകയായിര ുന്ന മഴുക്കീർ ചെറുശ്ശേരിയിൽ വീട്ടിൽ രതീഷിന്​ (രാഹുൽ ^34) കുത്തേറ്റു. ആർ.എസ്.എസ് പ്രവർത്തകനാണോടാ എന്നുചോദിച്ചാണ് മർദനം തുടങ്ങിയതെന്ന്​ പറയുന്നു. ഓടിയ രതീഷ് സമീപമുള്ള വീട്ടിൽ കയറിയെങ്കിലും പിന്നാ​ലെ എത്തിയ സംഘം കുത്തുകയായിരുന്നു.

രതീഷിനെ പൊലീസുകാരാണ് ജില്ല ആശുപത്രിയിൽ എത്തിച്ചത്. പിന്നീട് തിരുവല്ലയിലെ സ്വകാര്യ ആശുപത്രിയിലും പ്രവേശിച്ചു. പ്രകടനം വരു​േമ്പാൾ റോഡരികിൽ ബൈക്കിൽ ഇരുന്ന മഴുക്കീർ വിഷ്ണു ക്ഷേത്രത്തിലെ പൂജാരി കടപ്ര പെരുമ്പളം സ്വദേശി വിഷ്ണുവിനും മർദനമേറ്റു. വൈകീട്ട്​ നാലോടെ എം.സി റോഡിലെ പ്രാവിൻകൂട് ജങ്​ഷനിൽനിന്ന് തുടങ്ങിയ പ്രകടനം കടന്നുപോയ വഴികളിലെ ആർ.എസ്.എസ്^ബി.ജെ.പിയുടെ കൊടിമരങ്ങളും ഫ്ലക്സ് ബോർഡുകളും നശിപ്പിച്ചു.

പ്രകടനം കഴിഞ്ഞ്​ മടങ്ങിയ ഒരുസംഘം പ്രവർത്തകർ തിരുവൻവണ്ടൂർ സ്കൂൾ ജങ്​ഷനിലെ ചായക്കട നടത്തുന്ന വൃദ്ധനെ മർദിച്ചതായും പരാതിയുണ്ട്.