സൈബർ സഖാക്കൾ ആഞ്ഞുപിടിച്ചിട്ടും സി.പി.എമ്മിന്‍റെ പി.എസ്.സി വിഡിയോക്ക് ഇരട്ടിയോളം ഡിസ്​ലൈക്

പി.എസ്.സി നിയമനങ്ങൾ വൈകുന്നതുമായി ബന്ധപ്പെട്ട് സർക്കാറിനെതിരെയും പാർട്ടിക്കെതിരെയും ഉയർന്ന ആരോപണങ്ങളെ പ്രതിരോധിക്കാൻ സി.പി.എം പുറത്തിറക്കിയ വിഡിയോക്ക് യൂട്യൂബിൽ ലൈക്കുകളുടെ ഇരട്ടിയോളം ഡിസ്​ലൈക്. സൈബർ സഖാക്കൾ ആഞ്ഞുപിടിച്ചിട്ടും ഡിസ്​ലൈക് മറികടക്കാൻ സാധിച്ചിട്ടില്ല.

സംസ്ഥാന കമ്മിറ്റി അംഗം എം.ബി. രാജേഷാണ് സംസ്ഥാന കമ്മിറ്റിയുടെ ഔദ്യോഗിക യുട്യൂബ് ചാനലിൽ 'പി.എസ്.സി നിയമന വിവാദം - സത്യം പറയുന്ന രേഖകളും കണക്കുകളും' എന്ന തലക്കെട്ടോടെ ട്രൂ സ്റ്റോറി എന്ന വിഡിയോ അവതരിപ്പിച്ചത്. ആഗസ്റ്റ് രണ്ടിന് വിഡിയോ പുറത്തിറക്കിയതു മുതൽ ലൈക്കുകളുടെ എണ്ണത്തെക്കാൾ ഡിസ്​ലൈക്കാണ് മുന്നിട്ടുനിന്നത്.

സമൂഹമാധ്യമങ്ങളിൽ കൂടുതൽ ഇടപെടുന്നതിന്‍റെ ഭാഗമായി പ്രമുഖ നേതാക്കളെല്ലാം സി.പി.എമ്മിന്‍റെ യൂട്യൂബ്, ഫേസ്ബുക്ക് പേജുകളിലൂടെ വിവിധ വിഷയങ്ങളിൽ വിഡിയോ അവതരിപ്പിക്കുന്നുണ്ട്. അവയ്ക്കെല്ലാം പാർട്ടി അണികളിൽനിന്ന് മികച്ച പിന്തുണ കിട്ടിയപ്പോൾ പി.എസ്.സി വിശദീകരണ വിഡിയോ അനുഭാവികൾ തന്നെ ഡിസ്​ലൈക് ചെയ്ത് തോൽപ്പിച്ചതായാണ് വിവരം.

ലൈക്കുകളുടെ എണ്ണം കൂട്ടണമെന്ന് ആവശ്യപ്പെട്ട് അനുഭാവികളുടെ ഗ്രൂപ്പുകളിൽ ഉൾപ്പടെ സന്ദേശമെത്തിയിരുന്നു. എന്നിട്ടും ഡിസ്​ലൈകിനാണ് വൻ വർധനവുണ്ടായത്. വിഡിയോ ഡിസ്​ലൈക് ചെയ്തതായി ഫേസ്ബുക്, വാട്സാപ് കൂട്ടായ്മകളിലെ ചർച്ചകളിൽ പ്രവർത്തകർ തന്നെ സമ്മതിക്കുന്നുണ്ട്. അനുഭാവിയാണെന്ന് പറഞ്ഞുകൊണ്ടുതന്നെ നിരവധി പേർ സി.പി.എം വാദങ്ങളെ എതിർത്ത് കമന്‍റ് ചെയ്യുന്നുമുണ്ട്.

വിഡിയോ പുറത്തിറക്കി രണ്ട് ദിവസം പിന്നിടുമ്പോൾ 41k ലൈക്കും 78kഡിസ്​ലൈക്കുമാണ് ലഭിച്ചത്. പി.എസ്.സി നിയമനങ്ങളുമായി ബന്ധപ്പെട്ട വിവാദത്തിൽ സി.പി.എം നിലപാട് അണികൾക്കുപോലും സ്വീകാര്യമാകുന്നില്ലെന്ന് ഈ കണക്ക് വ്യക്തമാക്കുന്നു.