ആർ.എസ്​.എസിന്‍റെ ആഗ്രഹങ്ങൾ നടപ്പാകില്ലെന്ന് കോടിയേരി

തിരുവനന്തപുരം: എൽ.ഡി.എഫ്​ സർക്കാറിനെ പിരിച്ചുവിടാമെന്നത്​ ആർ.എസ്​.എസി​​െൻറ ആഗ്രഹം മാത്രമാണെന്നും ഭരണഘടനയിലെ വകുപ്പ്​ എന്ന ഒാലപ്പാമ്പിനെ കാണിച്ച്​ ഭയപ്പെടുത്താൻ നോക്കേണ്ടെന്നും ധൈര്യമുണ്ടെങ്കിൽ സർക്കാറിനെ പിരിച്ചുവിട​േട്ടയെന്നും സി.പി.എം സംസ്​ഥാന സെക്രട്ടറി കോടിയേരി ബാലകൃഷ്​ണൻ. കേരളത്തിൽ രാഷ്​ട്രപതിഭരണം നടപ്പാക്കണമെന്ന ആർ.എസ്​.എസ്​ ആവശ്യത്തോട്​ വാർത്തസമ്മേളനത്തിൽ പ്രതികരിക്കുകയായിരുന്നു അ​ദ്ദേഹം.

സി.പി.എം ശക്​തികേന്ദ്രങ്ങൾ ആക്രമിക്കണമെന്ന ബി.ജെ.പി ദേശീയ പ്രസിഡൻറ്​ അമിത്​ഷായുടെ അജണ്ടയാണ്​ സംസ്​ഥാനത്ത് ബി.ജെ.പിയും ആർ.എസ്​.എസും നടപ്പാക്കിയത്​. കൊലപാതകങ്ങളുടെ പേര്​ പറഞ്ഞ്​ സർക്കാറിനെ പിരിച്ചുവിടു​െന്നങ്കിൽ ആദ്യം പിരിച്ചുവിടേണ്ടത്​ ഉത്തർപ്രദേശ്​ സർക്കാറിനെയാണ്​. ഉത്തർപ്രദേശ്​, മഹാരാഷ്​ട്ര, മധ്യപ്രദേശ്​, രാജസ്​ഥാൻ സർക്കാറുകളെ പിരിച്ചുവിട്ടശേഷം മാത്രം കേരളത്തി​​െൻറ കാര്യം നോക്കിയാൽമതി. 

യു.ഡി.എഫ്​ സർക്കാറി​​െൻറ കാലത്ത്​ 27 സി.പി.എം പ്രവർത്തകരാണ്​ കൊല്ലപ്പെട്ടത്​. സർക്കാറിനെ പിരിച്ചുവിട്ട്​ ആറ്​ മാസത്തിനുള്ളിൽ തെരഞ്ഞെടുപ്പ്​ നടത്തിയാൽ ബി.ജെ.പിക്ക്​ ഇപ്പോഴുള്ള ഒരു സീറ്റ്​ കൂടി നഷ്​ടപ്പെടും. ഒ. രാജഗോപാലിനോട്​ വിരോധമുള്ള ആരെങ്കിലുമായിരിക്കും നീക്കത്തിന്​ പിന്നിൽ. സംസ്​ഥാനത്ത്​ അടുത്തിടെയുണ്ടായ അക്രമങ്ങളുടെ ഉത്തരവാദിത്തം ആർ.എസ്​.എസിനും ബി.ജെ.പിക്കുമാണ്​. സി.പി.എമ്മി​​െൻറ ശക്​തികേന്ദ്രങ്ങളിലാണ്​ ആക്രമണം നടന്നത്​. ബോധപൂർവം പ്രകോപനം സൃഷ്​ടിക്കുകയാണ്​.

ആഭ്യന്തരവകുപ്പ്​ മാത്രം വിചാരിച്ചാൽ ആക്രമണങ്ങൾ തടയാൻ സാധിക്കില്ല. ഇത്​ വർഗീയകലാപമല്ല. ബോധപൂർവമുണ്ടാക്കുന്ന അക്രമങ്ങളാണ്​. പൊലീസി​​െൻറ സാന്നിധ്യത്തിൽ കൊലപാതകം നടന്ന സാഹചര്യം മുമ്പും ഉണ്ടായിട്ടുണ്ട്​. പൊലീസ്​ സുരക്ഷയിൽ കൊലപാതകം തടയാനാകുമെന്ന്​ കരുതുന്നില്ല. സമാധാനം നിലനിർത്താൻ മുഖ്യമന്ത്രി മുൻകൈയെടുത്ത്​ നടത്തുന്ന പ്രവർത്തനങ്ങളോട്​ സഹകരിക്കാൻ സി.പി.എം തീരുമാനിച്ചിട്ടുണ്ട്​. ഉഭയകക്ഷിചർച്ചകളും ആറിന്​ സർവകക്ഷിയോഗവും വിളിച്ചിട്ടുണ്ട്​.

സമാധാനപൂർവമായ അന്തരീക്ഷം സൃഷ്​ടിക്കാൻ സി.പി.എം മുൻൈകയൈടുക്കും. അക്രമങ്ങൾ നടത്തരുതെന്ന്​ കീഴ്​ഘടകങ്ങളിൽ കർശനമായി റിപ്പോർട്ട്​ ചെയ്യും. അതാത്​ സ്​ഥലങ്ങളിലുണ്ടാകുന്ന വിഷയങ്ങൾ അവിടങ്ങളിൽ ചർച്ചചെയ്​ത്​ പരിഹരിക്കണമെന്നും സി.പി.എം സംസ്​ഥാനസമിതി തീരുമാനിച്ചതായി കോടിയേരി പറഞ്ഞു.