മുന്നണിക്ക്​ നാണക്കേട്​ ഉണ്ടാക്കുന്നത്​ അംഗീകരിക്കാനാവില്ല; ഐ.എൻ.എല്ലിന്​ സി.പി.എം മുന്നറിയിപ്പ്​

കോഴിക്കോട്​: മുന്നണിക്ക്​ നാണക്കേട്​ ഉണ്ടാക്കുന്നത്​ അംഗീകരിക്കാനാവില്ലെന്ന്​ ഇന്ത്യൻ നാഷനൽ ലീഗിന്​ സി.പി.എമ്മിന്‍റെ മുന്നറിയിപ്പ്​. ഇടതുമുന്നണിയിൽ നിൽക്കു​േമ്പാൾ പക്വത കാട്ടണമെന്നും ഐ.എൻ.എൽ നേതൃത്വത്തെ​ സി.പി.എം അറിയിച്ചു.

കൊച്ചിയിൽ കഴിഞ്ഞ ദിവസം നടന്ന സംസ്​ഥാന സെക്ര​േട്ടറിയറ്റ്​ യോഗം കൈയാങ്കളിയിൽ പിരിഞ്ഞതിനുപിന്നാലെ ഐ.എൻ.എൽ പിളർന്നിരുന്നു. ജന. സെക്രട്ടറി കാസിം ഇരിക്കൂറിനെ പാർട്ടിയിൽനിന്ന്​ പുറത്താക്കിയതായി സംസ്​ഥാന പ്രസിഡന്‍റ്​ എ.പി. അബ്ദുൽ വഹാബും വഹാബിനെ പുറത്താക്കിയതായി കാസിം ഇരിക്കൂറും വെവ്വേറെ വാർത്താസമ്മേളനങ്ങൾ വിളിച്ച്​ അറിയിച്ചു. ഐ.എൻ.എൽ ദേശീയ നേതൃത്വം കാസിം ഇരിക്കൂറി​െനാപ്പമാണ്​. വഹാബിനെ സംസ്​ഥാന പ്രസിഡന്‍റ്​ സ്​ഥാനത്തുനിന്ന്​​ ദേശീയ നേതൃത്വം പുറത്താക്കിയിട്ടുണ്ട്​.

ഞായറാഴ്ച കൊച്ചിയിൽ ഇരുവിഭാഗം അണികൾ തെരുവിൽ ഏറ്റുമുട്ടിയതടക്കമുള്ള കാര്യങ്ങൾ ചൂണ്ടിക്കാട്ടിയാണ്​ സി.പി.എമ്മിന്‍റെ മുന്നറിയിപ്പ്​. ഐ.എൻ.എൽ നേതൃത്വവുമായും മന്ത്രി അഹമ്മദ്​ ദേവർകോവിലുമായും സി.പി.എം നേതാക്കൾ ആ​ശയ വിനിമയം നടത്തിയിട്ടുണ്ട്​. പ്രശ്​നങ്ങൾ ഐ.എൻ.എൽ ത​െന്ന പരിഹരിക്കണമെന്ന നിലപാടാണ്​ സി.പി.എമ്മിനുള്ളത്​. ഐ.എൻ.എല്ലിനുള്ളിലെ തർക്കത്തിൽ തൽക്കാലം ഇടപെടേണ്ടതില്ലെന്നാണ്​ അവരുടെ തീരുമാനം. യോജിച്ച് മുന്നോട്ട് പോകാനാവാത്ത വിധം ഇരുപക്ഷവും അകന്നുകഴിഞ്ഞ സ്​ഥിതിക്ക്​ ഏതു രീതിയിൽ അനുരഞ്​ജത്തിലെത്തുമെന്ന ആശയക്കുഴപ്പം നിലനിൽക്കുന്നുണ്ട്​.

സംഘടനതലത്തിലെ പ്രശ്നങ്ങളിൽ അന്തിമ വാക്ക് അഖിലേന്ത്യ അധ്യക്ഷ​േന്‍റതാണ്. കാസിം ഇരിക്കൂർ സംസ്​ഥാന ജനറൽ െസക്രട്ടറിയായ ശേഷം അഖിലേന്ത്യ നേതൃത്വത്തിൽ പിടിമുറുക്കി ഏകാധിപത്യ പ്രവർത്തനം നടത്തുന്നതായാണ് വഹാബ് പക്ഷത്തിന്‍റെ ആരോപണം. തീരുമാനങ്ങളെടുക്കുന്നതിൽ കൂടിയാലോചനകൾ നടക്കുന്നില്ലെന്നും അവർ കുറ്റപ്പെടുത്തുന്നു. അതേസമയം, സുതാര്യമായാണ് പ്രവർത്തിക്കുന്നതെന്നും അധികാരമോഹികളായ ചിലരുടെ പ്രവർത്തനങ്ങളാണ് പാർട്ടിയിൽ പ്രശ്നങ്ങളുണ്ടാക്കുന്നതെന്നുമാണ്​ കാസിം ഇരിക്കൂർ പക്ഷം പറയുന്നത്​.