ബലിയിടാൻ പോയ വിദ്യാർഥിയിൽനിന്ന്​ 2000 രൂപ പിഴയടപ്പിച്ച്​ രസീതിൽ 500 എഴുതിയ പൊലീസുകാരന്​ സസ്​പെൻഷൻ

തിരുവനന്തപുരം: ശ്രീകാര്യത്ത്​ പിതൃതർപ്പണ ചടങ്ങുകൾക്ക് ക്ഷേത്രത്തിലേക്കുപോയ വിദ്യാർഥിയെയും അമ്മയെയും പൊലീസ് തടഞ്ഞ് 2000 രൂപ പിഴ ഈടാക്കിയശേഷം 500 രൂപയുടെ രസീത്​ നൽകിയ സംഭവത്തിൽ സസ്പെൻഷൻ. സിവിൽ പൊലീസ് ഓഫിസർ അരുൺ ശശിയെയാണ് സസ്പെൻഡ് ചെയ്തത്. സി.ഐക്കെതിരെ അന്വേഷണത്തിനും കമ്മീഷണർ ഉത്തരവിട്ടു.

ശ്രീകാര്യം വെഞ്ചാവോട് ശബരിനഗറിലെ നവീനിന്‍റെ (19) പരാതി പ്രകാരമാണ്​ നടപടി. കർക്കടവാവ് പിതൃതർപ്പണം നടത്താൻ നവീനും അമ്മയും ശ്രീകാര്യം പുലിയൂർക്കോട് ശ്രീകൃഷ്ണ സ്വാമി ക്ഷേത്രത്തിൽ ബുക്ക്​ ചെയ്തിരുന്നു. ബലിയിടാനായി കാറിൽ പോയ ഇരുവരെയും ശ്രീകാര്യം മാർക്കറ്റിനു സമീപത്തുവെച്ച്​ പൊലീസ് തടഞ്ഞു. ബലിയിടാൻ പോകുകയാണെന്നു പറഞ്ഞപ്പോള്‍ ബലിയിടേണ്ടെന്നും തിരിച്ചു പോകാനും നിര്‍ദേശിച്ചു.

കാർ പിന്നിലേക്കെടുത്തപ്പോൾ പൊലീസുകാരനെത്തി 2000 രൂപ പിഴ അടക്കാൻ ആവശ്യപ്പെട്ടു. ഇരുവരെയും ശ്രീകാര്യം സ്റ്റേഷനിലേക്കു കൊണ്ടുപോയി 2000 രൂപ വാങ്ങിയശേഷം 500 രൂപയുടെ രസീത്​ നൽകുകയും ചെയ്​തു. തുടർന്നാണ് നവീൻ സിറ്റി പൊലീസ് കമ്മിഷണർക്കു പരാതി നൽകിയത്. അതേസമയം, രസീത്​ എഴുതിയതിൽ പിഴവ്​ സംഭവിച്ചെന്നാണ്​ പൊലീസിന്‍റെ വിശദീകരണം. പിഴവ് മനസിലായതോടെ നവീനെ ഫോണിൽ ബന്ധപ്പെട്ടെന്നും നവീൻ പ്രതികരിച്ചില്ലെന്നും ഉദ്യോഗസ്ഥര്‍ പറയുന്നു. ക്ഷേത്രത്തിൽ ബലിതർപ്പണത്തിനുള്ള സൗകര്യമുണ്ടെന്നറിഞ്ഞ് നേരത്തെ ടോക്കണെടുത്താണ് ക്ഷേത്രത്തിൽ പോയതെന്നും എന്നാല്‍, ഒരിക്കൽ പോലും സത്യവാങ്മൂലമുണ്ടോ എന്ന് പൊലീസ് ചോദിച്ചില്ലെന്നും പിഴയീടാക്കുകയായിരുന്നെന്നുമാണ്​ നവീൻ പ്രതികരിക്കുന്നത്​.