നിർണായക സമസ്ത മുശാവറ അഞ്ചിന്

കോഴിക്കോട്​: സമസ്തയിലെ പ്രശ്നങ്ങൾ പുതിയതലങ്ങളിൽ എത്തിനിൽക്കെ, നിർണായക മുശാവറ യോഗം ജൂൺ അഞ്ചിന്​. സമസ്തയിലെ ലീഗ്​ വിരുദ്ധരുമായുള്ള പ്രശ്നങ്ങൾ പൊട്ടിത്തെറിയിൽ എത്തിയ സാഹചര്യത്തിൽ ഇതുസംബന്ധിച്ച മുശാവറയിലെ ചർച്ചയും തീരുമാനവും കാക്കുകയാണ്​ ഇരുവിഭാഗവും. അതിനിടെ, സമസ്ത നേതൃത്വത്തെയും സുപ്രഭാതം പത്രത്തിന്‍റെ നയങ്ങളെയും പരസ്യമായി വിമർശിച്ചതിന്‍റെ കാരണം തേടി മുശാവറ അംഗവും പത്രത്തിന്‍റെ ചീഫ്​ എഡിറ്റും പബ്ലിഷറുമായ ഡോ. ബഹാഉദ്ദീൻ നദ്​വിക്ക്​ നൽകിയ നോട്ടീസിന്​ അദ്ദേഹം മറുപടി നൽകി. സുപ്രഭാതത്തിന്‍റെ നയനിലപാടുകളോട്​ വിയോജിപ്പുണ്ടെന്നും കൂടുതൽ കാര്യങ്ങൾ മുശാവറ യോഗത്തിൽ വ്യക്തമാക്കുമെന്നുമാണ്​ അദ്ദേഹം നേതൃത്വത്തിന്​ മറുപടി നൽകിയതെന്ന്​ അറിയുന്നു. ഈ വിഷയത്തിൽ ഊന്നിയാകും മുശാവറയിലെ ചർച്ച.

സുപ്രഭാതം നടത്തിപ്പുമായി ബന്ധപ്പെട്ട്​ ശക്തമായ വി​യോജിപ്പുകളുണ്ടെങ്കിലും അതിന്‍റെ ഉത്തരവാദപ്പെട്ട സ്ഥാനങ്ങളിൽനിന്ന്​ ബഹാഉദ്ദീൻ നദ്​വി തൽക്കാലം രാജിവെക്കില്ല. സ്വയം സ്ഥാനമൊഴിഞ്ഞാൽ അത്​ ലീഗ്​ വിരുദ്ധർക്ക്​ നേട്ടമാകുമെന്നതാണ്​ കാരണം. അതേസമയം, മുശാവറയിൽ ബഹാഉദ്ദീൻ നദ്​വിക്കെതിരെ കടുത്ത നടപടി ഉണ്ടായാൽ അത്​ ഗുരുതര പ്രത്യാഘാതമുണ്ടാക്കുമെന്നതിനാൽ അത്തരം നീക്കങ്ങൾക്ക്​​ സമസ്ത നേതൃത്വം തയാറാകില്ല. താക്കീതിൽ ഒതുക്കി വിഷയം അവസാനിപ്പിക്കാനാണ്​ സാധ്യത.

അതേസമയം, സി.പി.എമ്മിനോടുള്ള സമസ്തയുടെ സമീപനത്തിലുണ്ടായ നയ വ്യതിയാനത്തിനെതിരെയും ഇക്കാര്യത്തിൽ സുപ്രഭാതം പത്രത്തിന്‍റെ പങ്കിനെക്കുറിച്ചും ബഹാഉദ്ദീൻ നദ്​വി ഉൾപ്പെടെ മുസ്​ലിം ലീഗിനോട്​ ആഭിമുഖ്യമുള്ള മുശാവറ അംഗങ്ങൾ തുറന്നടിക്കുമെന്നാണ്​ അറിയുന്നത്​. മുസ്​ലിം ലീഗുമായി ഇതപര്യന്തമായി തുടരുന്ന ബന്ധത്തിന്​ കോട്ടം തട്ടുന്നതാണ്​ പത്രത്തിന്‍റെ നിലപാടെന്ന്​ അഭിപ്രായമുള്ളവർ മുശാവറയിൽ നിരവധി പേരുണ്ട്​. പ്രശ്നം കൂടുതൽ കലുഷിതമാകാതിരിക്കാനാണ്​ ഇവർ പരസ്യ പ്രസ്താവന നടത്താത്തത്​. മുശാവറയിൽ നേതൃത്വം എന്ത്​ നിലപാട്​ സ്വീകരിക്കുമെന്നതിനെ ആശ്രയിച്ചായിരിക്കും ലീഗ്​ അനുകൂല വിഭാഗത്തിന്‍റെ തുടർനടപടി. അനുരഞ്ജനത്തിനുള്ള സാഹചര്യമൊരുക്കാൻ നേതൃത്വം മുൻകൈയെടുത്താൽ അതുമായി സഹകരിക്കുമെങ്കിലും ലീഗ്​ വിരുദ്ധ വിഭാഗത്തോട്​ ഒരുനിലക്കും നീക്കുപോക്ക്​ വേണ്ടെന്ന ഉറച്ച നിലപാടിലാണ്​ ബഹാഉദ്ദീൻ നദ്​വി അടക്കമുള്ളവർ.