നവജാതശിശുവിന്‍റെ മരണം: ഇരുട്ടില്‍ തപ്പി പൊലീസ്

ചാത്തന്നൂര്‍: നവജാതശിശുവിന്‍റെ മരണത്തില്‍ ഇരുട്ടില്‍ തപ്പി പൊലീസ്. നൂറോളം പേരെ ചോദ്യം ചെയ്യുകയും സി.സി.ടി.വി ദൃശ്യങ്ങള്‍, മൊബൈല്‍ ടവര്‍ എന്നിവ കേന്ദ്രീകരിച്ച് അന്വേഷണം നടത്തുകയും ചെയ്​തിട്ടും കേസില്‍ കാര്യമായ പുരോഗതിയുണ്ടായിട്ടില്ല.

പ്രദേശവാസികളുള്‍പ്പെടെയുള്ളവരെ ചോദ്യംചെയ്‌തെങ്കിലും നിര്‍ണായക വിവരങ്ങളൊന്നും അന്വേഷണസംഘത്തിന് ലഭിച്ചില്ല. പ്രദേശത്തെ ഓരോ വീട്ടിലെയും അംഗങ്ങളുടെ വിവരങ്ങള്‍ ശേഖരിക്കുന്നതിലേക്കാണ്​ പൊലീസ് കടന്നത്.

കുട്ടിയെ കിട്ടിയ സ്ഥലത്ത് വിദഗ്ധസംഘം ഇതിനോടകം രണ്ടുതവണ പരിശോധന നടത്തിയിരുന്നു. നിലവില്‍ ശാസ്ത്രീയ തെളിവുകളുടെ അടിസ്ഥാനത്തിലാണ് അന്വേഷണം മുന്നോട്ട് പോകുന്നത്​.