നമ്മുടെ കടഭാരം ആരുടെ ആനന്ദം?

സ്വന്തം അധികാരപരിധിക്കുള്ളിൽ താമസിക്കുന്ന മനുഷ്യരുടെ ജീവിതം അനുദിനം മെച്ചപ്പെടുത്തുകയെന്നതാണ്​ ഏതൊരു സർക്കാരിന്‍റെയും പ്രാഥമിക ചുമതല. വെറുതെ മെച്ചപ്പെടുത്തുകയല്ല. തൊട്ടതിനും പിടിച്ചതിനുമൊക്കെ നികുതിയും ഫീസുകളും സെസുമൊ​ക്കെ ചുമത്തി ജനങ്ങളുടെ പക്കൽ നിന്നും പണം ഈടാക്കിക്കൊണ്ടു തന്നെയാണ്​ ക്ഷേമപ്രവർത്തനങ്ങളും വികസനപ്രവർത്തനങ്ങളും നടത്തുന്നത്​. കോടിക്കണക്കിനു മനുഷ്യർക്കുവേണ്ടി ഈ പ്രവർത്തനങ്ങൾ രൂപകൽപന ചെയ്യാനും ഏകോപിപ്പിച്ച്​ നടപ്പാക്കാനും മറ്റുമായി ലക്ഷക്കണക്കിനു ജീവനക്കാരെ​ നിയമിച്ചിട്ടുമുണ്ട്​.

സർക്കാരിന്‍റെ ഈ ലക്ഷ്യം അട്ടിമറിക്കപ്പെടുകയും ഏതാനും ലക്ഷം വരുന്ന ജീവനക്കാരുടെ ശമ്പളവും മറ്റും മുടങ്ങാതിരിക്കാൻ കോടിക്കണക്കിന്​ സാധാരണക്കാർ വിട്ടുവീഴ്ചകൾ ചെയ്യണമെന്നു വന്നാൽ ജീവിതം ദുസഹമായിത്തീരും. കേരളത്തിന്‍റെ കാര്യമെടുത്താൽ 1980കളിൽ നമ്മുടെ സംസ്ഥാനത്തിന്‍റെ തനതുനികുതി വരുമാനവും ശമ്പളം, പെൻഷൻ, പലിശ ചെലവുകളുമായി വലിയ വിത്യാസമില്ലായിരുന്നു. 1980-81ൽ ശമ്പളത്തിനും പെൻഷനും പലിശക്കുമായി 376.79 കോടി രൂപ ചെലവഴി​ച്ചപ്പോൾ സംസ്ഥാന സർക്കാരിന്‍റെ തനതു നികുതി വരുമാനം 336.55 കോടി രൂപയായിരുന്നു. അന്നു ശമ്പളം, പെൻഷൻ, പലിശ ചെലവുകൾക്കായി 40.24 കോടി രൂപ കടമെടുക്കേണ്ടിവന്നു.

ചെലവിന്‍റെ 10.68 ശതമാനമായിരുന്നു ഈ കടം. 1990ൽ ഈ ചെലവ്​​ 2316.42 കോടിയും വരുമാനം 1340.34 കോടിയുമായി. ശമ്പളം, പെൻഷൻ, പലിശയും തനതു വരുമാനവും തമ്മിലെ കമ്മി 976.08 കോടി. അന്നും ഈ തുക കടമെടുത്താണ്​ നികത്തിയത്​. ചെലവിന്‍റെ 42 ശതമാനമായിരുന്നു അന്നത്തെ കടം. അനിയന്ത്രിതമായി വർധിച്ചു കൊണ്ടിരുന്ന ഈ ചെലവ്​ നിയന്ത്രിക്കാൻ തുടർന്നു സംസ്ഥാനം ഭരിച്ച ഇടതുവലതു മുന്നണികൾ ശ്രമിച്ചില്ല. 2021ലെ ഓഡിറ്റ് ചെയ്ത സർക്കാർ കണക്കുകൾ പ്രകാരം ശമ്പളം, പെൻഷൻ, പലിശ ചെലവുകൾക്കു 94695.67 കോടി രൂപ ചെലവിട്ടപ്പോൾ കേരളത്തിന്‍റെ തനതു നികുതി വരുമാനം 58340.52 കോടി രൂപ മാത്രമായിരുന്നു.

ഈ ചെലവുകൾക്ക്​ 2021-22ൽ കടമെടുത്തത്​ 36355 കോടി രൂപയാണ്​. 2024-25 സാമ്പത്തിക വർഷത്തേക്കുള്ള ബജറ്റ്​ എസ്റ്റിമേറ്റിൽ ശമ്പളം 40674.56 കോടി, പെൻഷൻ 28609.04 കോടി, പലിശ 28694.24 കോടി എന്നിങ്ങനെ ആകെ 97977.84 കോടിയുടെ ചെലവാണ്​ പ്രതീക്ഷിക്കുന്നത്​. ഇതേ കാലയളവിൽ പ്രതീക്ഷിക്കുന്ന തനതു സംസ്ഥാന നികുതി വരുമാനം 84883.51 കോടി രൂപ മാത്രവും​. 1980 - 2024 കാലഘട്ടത്തിൽ ഏറ്റവും കൂടുതൽ വർധനയുണ്ടായത്​ പെൻഷൻ ബാധ്യതയിലാണ്​. കണക്കുകൾ ഇങ്ങനെയാണ്​.

ഇനം 1980-81 2024-25 (ബജറ്റ്​ എസ്റ്റിമേറ്റ്​) വർധനവ്​ (ഇരട്ടിയിൽ)

ശമ്പളം: 296.21 40674.56 136

പെൻഷൻ: 31.87 28609.04 896

പലിശ: 48.71 28694.24 588

സംസ്ഥാന തനതു നികുതി വരുമാനം: 336.55 84546.96 251

ഇതനുസരിച്ച്​ 1980 മുതൽ 2024 വരെയുള്ള കാലത്തു പെൻഷൻ ചെലവിലുണ്ടായ വർധന 896 ഇരട്ടിയാണ്​. വരുമാനത്തിലുണ്ടായ വർധന 251 ഇരട്ടി മാത്രവും. ഈ തരത്തിലുള്ള ചെലവഴിക്കൽ സംസ്ഥാനത്തിന്‍റെ സാമ്പത്തിക ഭദ്രത തകിടംമറിക്കുകയും ക്ഷേമപെൻഷനുകളും മറ്റാനുകൂല്യങ്ങളും മുടങ്ങാൻ ഇടയാക്കുകയും സാധാരണക്കാരുടെ ജീവിതം കൂടുതൽ വിഷമകരമാക്കുകയും ​ചെയ്യുമെന്ന്​ സാമ്പത്തിക വിദഗ്​ധർ ചൂണ്ടിക്കാട്ടുന്നു.