ഒക്​ടോബർ രണ്ടിനുള്ളിൽ ഇന്ത്യ ഹിന്ദുരാഷ്​ട്രമാക്കണം, ഇല്ലെങ്കിൽ ഞാൻ ജലസമാധിയടയും -ആചാര്യ മഹാരാജ്​

ന്യൂഡൽഹി: ഗാന്ധി ജയന്തിയായ ഒക്​ടോബർ രണ്ടിനുള്ളിൽ ഇന്ത്യ ഹിന്ദുരാജ്യമാക്കണമെന്ന്​ ആവശ്യപ്പെട്ട്​ ജഗദ്​ഗുരു പരമഹംസ്​​ ആചാര്യ മഹാരാജ്​ രംഗ​ത്ത്​. ഇല്ലെങ്കിൽ താൻ സരയൂ നദിയിൽ ചാടി ജലമസമാധിയടയുമെന്നും മഹാരാജ്​ മാധ്യമങ്ങളോട്​ പറഞ്ഞു.

''ഒക്​ടോബർ രണ്ടിനുള്ളിൽ ഇന്ത്യ ഹിന്ദുരാജ്യമാക്കണം. അല്ലെങ്കിൽ ഞാൻ സരയൂ നദിയിൽ ജലസമാധിയടയും. കൂടെ രാജ്യത്തുള്ള മുസ്​ലിംകളുടെയും ക്രിസ്ത്യാനികളുടെയും പൗരത്വം എടുത്തുകളയണം'' -ആചാര്യ മഹാരാജ്​ പറഞ്ഞു.

അയോധ്യയിലെ സന്യാസി സമൂഹത്തിനിടയിൽ വലിയ സ്വാധീനമുള്ളയാളാണ്​ മഹാരാജ്​. ​ഇദ്ദേഹത്തിന്‍റെ ആവശ്യങ്ങൾ പൂർത്തീകരിക്കുന്നതിനായി ഹിന്ദു സനാതൻ ധർമ സൻസദ്​ എന്ന പേരിൽ സംഘടന രൂപീകരിക്കാൻ സന്യാസിമാർക്കുള്ളിൽ നീക്കമുണ്ട്​. മുമ്പ്​ 15 ദിവസം മഹാരാജ്​ നിരാഹാര സമരം അനുഷ്​ഠിച്ചിരുന്നു. തുടർന്ന്​ കേന്ദ്ര ആഭ്യന്തര മന്ത്രി അമിത്​ ഷായുടെ ഉറപ്പിനെത്തുടർന്നാണ്​ നിരാഹാരം അവസാനിപ്പിച്ചത്​.