ശർക്കര മഹാരാഷ്​ട്രയിൽനിന്ന്​; വിവാദമുണ്ടാക്കി ശബരിമലയുടെ യശസ്സ്​​ തകർക്കുന്നു​ -ദേവസ്വം ബോർഡ്​

കൊച്ചി: ശബരിമലയിലേക്ക്​ അപ്പം, അരവണ നിർമാണത്തിന​്​ മഹാരാഷ്​​ട്രയിലെ കമ്പനിയിൽനിന്നാണ്​ ശർക്കര വാങ്ങുന്നതെന്നും ഗൾഫ്​ രാജ്യങ്ങളിലേക്കും കയറ്റി അയക്കുന്നതിനാലാണ്​ ഹലാൽ മുദ്ര രേഖപ്പെടുത്തിയിട്ടുള്ളതെന്നും ദേവസ്വം ബോർഡ്​ ഹൈകോടതിയിൽ.

അപ്പം, അരവണ വിൽപനയിലൂടെ ശബരിമലയ്​ക്ക്​ ലഭിക്കുന്ന വരുമാനം ഇല്ലാതാക്കാനാണ് ഹലാൽ മുദ്രയു​െടയും മറ്റും പേരിൽ തെറ്റായ പ്രചാരണങ്ങളിലൂടെ ചിലർ ശ്രമിക്കുന്നത്​. അപ്പം, അരവണ വിൽപനയാണ് ശബരിമലയിലെ പ്രധാന വരുമാനം. ശബരിമലയുടെ യശസ്സ്​ തകർക്കാൻ കരുതിക്കൂട്ടിയുള്ള ശ്രമമാണ്​ ഇതിന്​ പിന്നിൽ. തെറ്റായ പ്രചാരണത്തിലൂടെ സാമുദായിക സൗഹാർദം തകർക്കാനും ചിലർ ലക്ഷ്യമിടുന്നു.

Also Read:ശബരിമലയിലെ 'ഹലാൽ ശർക്കര' കമ്പനിയുടമ ശിവസേന നേതാവ്; വെട്ടിലായി ബി.ജെ.പി

ഇത്തരത്തി​െല നിരവധി വ്യാജ വാർത്തകൾ സമൂഹ മാധ്യമങ്ങളിലൂടെ പ്രചരിപ്പിക്കുന്നുണ്ട്. ഇതിനെതിരെ ശബരിമല എക്സിക്യൂട്ടിവ് ഓഫിസർ സന്നിധാനം ​െപാലീസിന് പരാതി നൽകിയതായും ദേവസ്വം ബോർഡ്​ സ്ഥിരം സമിതി കൗൺസിൽ ഹൈകോടതിയിൽ സമർപ്പിച്ച വിശദീകരണപത്രികയിൽ പറയുന്നു.

ശബരിമലയിൽ അപ്പം, അരവണ നിർമാണത്തിന് ഹലാൽ മുദ്രയുള്ള ശർക്കര ഉപയോഗിക്കുന്നത് തടയണമെന്നാവശ്യപ്പെട്ട്​ ശബരിമല കർമസമിതി ജനറൽ കൺവീനർ എസ്.ജെ.ആർ. കുമാർ നൽകിയ ഹരജിയിലാണ്​ വിശദീകരണം.

Also Read:ഹലാലി​െൻറ പേരിൽ വിദ്വേഷ പ്രചാരണം

2019-20 വർഷം വർധാൻ കമ്പനി നൽകിയ ശർക്കര പാക്കറ്റിൽ ചിലതിൽ ഹലാൽ മുദ്രയുണ്ടായിരുന്നു. ഇതേക്കുറിച്ച്​ അന്വേഷിച്ചപ്പോഴാണ്​ അറബ് രാജ്യങ്ങളിലേക്ക് കയറ്റി അയക്കുന്നതിനാലാണ് ഹലാൽ മുദ്ര രേഖപ്പെടുത്തിയിരിക്കുന്നതെന്ന​ മറുപടി ലഭിച്ചത്​. അറബ് രാജ്യങ്ങളിലേക്ക് കയറ്റി അയക്കാൻ ഹലാൽ മുദ്ര അനിവാര്യമാണെന്നും ദുരുദ്ദേശ്യപരമായ ഹരജി തള്ളണമെന്നും വിശദീകരണപത്രികയിൽ പറയുന്നു. ഹരജി ദേവസ്വം ബെഞ്ച്​ തിങ്കളാഴ്​ച പരിഗണിക്കും.