ഹർത്താൽ അക്രമം: ഡി.ജി.പിക്ക്​ അതൃപ്​തി, ഉദ്യോഗസ്​ഥർക്ക്​ ശകാരം

തിരുവനന്തപുരം: ഹര്‍ത്താൽ അക്രമങ്ങളില്‍ പൊലീസ്​ ഉദ്യോഗസ്​ഥർക്ക്​ ഡി.ജി.പി ലോക്​നാഥ്​ ബെഹ്​റയുടെ ശകാരം. വീ ഴ്​ചയുണ്ടായാൽ ഉദ്യോഗസ്​ഥർക്കെതിരെ നടപടിയെടുക്കുമെന്നും ജില്ല പൊലീസ്​ മേധാവികളുമായുള്ള വിഡിയോ കോൺഫറൻസ ിൽ അദ്ദേഹം മുന്നറിയിപ്പുനൽകി. ജില്ലകളിലെ അക്രമസംഭവങ്ങളുടെയും നടപടികളുടെയും റിപ്പോര്‍ട്ടും അദ്ദേഹം​ തേടി. അക്രമ സംഭവങ്ങളുണ്ടാകാൻ സാധ്യതയുണ്ടെന്ന ഇൻറലിജന്‍സ് റിപ്പോര്‍ട്ട് അവഗണിച്ചതിലെ അതൃപ്തിയും ഡി.ജി.പി പ്രകടിപ്പിച്ചു.

ശബരിമല യുവതി ദർശനത്തിനുപിന്നാലെ അക്രമസാധ്യതയുള്ളതിനാൽ മുൻകരുതൽ അറസ്​റ്റ്​ വേണമെന്ന​ ഇൻറലിജൻസ്​ റിപ്പോർട്ടിനെ തുടർന്ന്​ ഡി.ജി.പിയും ചീഫ്​ സെക്രട്ടറി ടോംജോസും യോഗം ചേർന്ന്​ മുന്നൊരുക്ക നിർദേശം നൽകിയിരുന്നു. അത്​ ലംഘിക്കപ്പെട്ടതാണ്​ ഡി.ജി.പിയെ ക്ഷുഭിതനാക്കിയത്​. ഇൻറലിജൻസ്​ റിപ്പോർട്ട്​ അവഗണിച്ചെന്നും അക്രമമുണ്ടായേക്കാവുന്ന സ്​ഥലങ്ങളുടെയും വ്യക്തികളുടെയും വിശദാംശം നൽകിയിട്ടും നടപടിയുണ്ടായില്ലെന്നും ബെഹ്​റ പറഞ്ഞു. തിരുവനന്തപുരം, തൃശൂർ, പാലക്കാട്​, കോഴിക്കോട്​, കാസർകോട്​​ ജില്ല പൊലീസ്​ മേധാവികൾക്കാണ്​ രൂക്ഷവിമർശനം ഏൽക്കേണ്ടിവന്നത്​. ഉദ്യോഗസ്​ഥവീഴ്​ചയാണ്​ പ്രശ്​നങ്ങളുണ്ടാക്കിയതെന്ന്​ ജില്ല പൊലീസ്​ മേധാവികൾ വിശദീകരിച്ചു.

വ്യാപാരികള്‍ കട തുറക്കാൻ തയാറായെങ്കിലും പൊലീസ്​ സംരക്ഷണം ലഭിച്ചില്ല. കോഴിക്കോട് മിഠായിത്തെരുവിലടക്കം ആക്രമണം തടുക്കാനായില്ല. ഇതെല്ലാം പൊലീസ്​ വീഴ്ചയാണെന്ന ആരോപണം ശക്തമാണെന്ന്​ ഡി.ജി.പി ചൂണ്ടിക്കാട്ടി. ഹർത്താൽ ഉൾപ്പെടെ അക്രമ സംഭവങ്ങളിലേർപ്പെട്ടവരുടെ ആൽബവും പട്ടികയും തയാറാക്കി ‘ഒാപറേഷൻ ബ്രോക്കൺ വി​േൻറാ’ ശരിയായ രീതിയിൽ നടപ്പാക്കണമെന്നും അദ്ദേഹം നിർദേശിച്ചു. കുറ്റവാളികളിൽനിന്ന്​ തന്നെ പിഴ ഇൗടാക്കുന്ന നിലയിൽ കേസെടുക്കണമെന്നും വീഴ്​ച വരുത്തിയാൽ ഉദ്യോഗസ്​ഥർക്കെതിരെ നടപടിയെടുക്കേണ്ടിവരുമെന്നും മുന്നറിയിപ്പ്​ നൽകുകയും ചെയ്​തു.ഗവർണർ റിപ്പോർട്ട്​ ആവശ്യപ്പെട്ട സാഹചര്യത്തിൽ, മുഖ്യമന്ത്രി പിണറായി വിജയൻ ഡി.ജി.പിയെ വിളിപ്പിച്ച്​ പൊലീസ്​ നടപടികളെയും വീഴ്​ചകളെയും കുറിച്ച്​ ആരാഞ്ഞിരുന്നു​.