കഴുകിക്കളയാം ആത്​മീയ മാലിന്യങ്ങൾ

വിശ്വാസിയുടെ ജീവിതത്തെക്കുറിച്ചുള്ള വിചിന്തനവും ആത്മ പരിശോധനയുമാണ് വ്രതാനുഷ്​ഠാനത്തി​​​​െൻറ പരമ  ലക്ഷ്യം. സ്വയംവിചാരണ ചെയ്യാനും നേട്ടകോട്ടങ്ങള്‍ വിലയിരുത്താനുമുള്ള അസുലഭ സന്ദർഭം. നന്മകള്‍ വർധിപ്പിക്കാനും തിന്മകള്‍ വിപാടനം ചെയ്യാനും അതുവഴി വിശ്വാസിക്ക്​ കഴിയുന്നു. ആത്മപരിശോധനയിലൂടെ വിശ്വാസിയുടെ മനസ്സും ശരീരവും നന്മയില്‍ സ്ഫുടംചെയ്‌തെടുത്ത് ശരീരവും നന്മക്ക്​ പൂർണമായും പാകപ്പെടുത്തുന്ന സാഹചര്യത്തിനാണ് യഥാർഥത്തില്‍ റമദാനിൽ ചെകുത്താന്മാര്‍ തടവിലാകുന്നതും സ്വര്‍ഗ കവാടങ്ങള്‍ തുറക്കപ്പെടുന്നതുമെന്ന് തിരുനബി തങ്ങളുടെ ഉദ്​ബോധനത്തില്‍നിന്ന്​ നമുക്ക് മനസ്സിലാക്കാന്‍ കഴിയുന്നത്. സത്യവിശ്വാസി ആത്മപരിശോധനയിലൂടെ സംശുദ്ധനായിത്തീരുമ്പോള്‍ സ്വാഭാവികമായി സംഭവിക്കുന്ന പ്രക്രിയയാണ്​ ഈ  സംഭവങ്ങളെന്ന്​ നമുക്ക് മനസ്സിലാക്കാന്‍ പ്രയാസമില്ല.

മുഹമ്മദ് നദീര്‍ മൗലവി ബാഖവി (ചെയര്‍മാന്‍, ഇമാം ഏകോപന സമിതി)

 

നമ്മുടെ ചുറ്റുപാടിലുമുള്ള മത-രാഷ്​ട്രീയ-സാമൂഹിക സംഘടനകളെല്ലാംതന്നെ ഇടക്കിടെ അവരുടെ പ്രവര്‍ത്തനങ്ങള്‍ വിലയിരുത്തുകയും വീഴ്ചകള്‍ പരിഹരിച്ച്​ കൂടുതല്‍ മെച്ചപ്പെട്ട നിലവാരത്തിലേക്ക് പ്രവര്‍ത്തനങ്ങള്‍ വിപുലീകരിക്കുകയും ചെയ്യാറുണ്ട്. സത്യവിശ്വാസികളെ സംബന്ധിച്ചിടത്തോളം ഇത്​ ദൈവകല്‍പിതമായ ബാധ്യതയാകുന്നു. അല്ലാഹു പറയുന്നു:  ‘‘സത്യവിശ്വാസികളേ, നിങ്ങള്‍ അല്ലാഹുവിനോട് ഭക്തിയുള്ളവരായിരിക്കുവിന്‍. ഓരോ മനുഷ്യരും നാളേക്കു വേണ്ടി എന്താണ്​ ചെയ്​തു​െവച്ചിട്ടുള്ളതെന്ന് ചിന്തിക്കുകയും ചെയ്യുവിന്‍’’ (ഖുര്‍ആന്‍ 59-:18). ഈ വാക്യത്തില്‍ ആത്മപരിശോധന കൽപിക്കുക മാത്രമല്ല, അതി​​​​െൻറ മാനദണ്ഡംകൂടി വരച്ചുകാണിക്കുന്നു. പ്രവര്‍ത്തനങ്ങളെ അല്ലാഹുവിനോടുള്ള വിധേയത്വം (തഖ്​വ) വിലയിരുത്തി തീരുമാനമെടുക്കാനാണ് നിർദേശം.  

ഈ അടിസ്ഥാനത്തില്‍ ജീവിതത്തെ സ്വയംവിചാരണ ചെയ്ത്​ നന്മയുടെ പാതയില്‍ ഉറപ്പിച്ചുനിര്‍ത്താനും തിന്മ വിപാടനം ചെയ്യാനും  അല്ലാഹു നിശ്ചയിച്ചുതന്ന വിശുദ്ധ മാസമാണ് റമദാന്‍. ഈ ലോകത്ത് സ്വയം വിചാരണ ചെയ്യുന്നവന് അന്ത്യനാളില്‍ വിചാരണ ലഘൂകരിക്കപ്പെടുമെന്നുള്ള പ്രവാചക വചനവും ഇതിനോട് ചേര്‍ത്തുവായിക്കേണ്ടതാണ്. നമുക്ക്‌ സ്വയം വിചാരണ ചെയ്യാന്‍ കോടതിയും വക്കീലും മധ്യസ്ഥനും ആവശ്യമില്ല.  മഹാപാണ്ഡിത്യമോ ശിപാര്‍ശകളോ ആവശ്യമില്ല.  അല്ലാഹുവിനെ ഭയ​െപ്പടുന്ന ഒരു മനസ്സാക്ഷി മാത്രമാണ് ആവശ്യം. ഇതിലൂടെ നമ്മുടെ ആത്മീയ മാലിന്യങ്ങളെ (പാപങ്ങള്‍) കഴുകിക്കളഞ്ഞ്​ സംശുദ്ധരാവാന്‍ നമുക്ക് കഴിയും. അല്ലാഹു വിശുദ്ധ മാസത്തില്‍ നമ്മെ അനുഗ്രഹിക്കുമാറാകട്ടെ. (ആമീന്‍)