വിഴിഞ്ഞം സംഘര്‍ഷത്തിൽ തീവ്രസ്വഭാവമുള്ള സംഘടനകള്‍ ഉൾപ്പെട്ടതായി വിവരമില്ലെന്ന് ഡി.ഐ.ജി ആർ. നിശാന്തിനി

തിരുവനന്തപുരം: വിഴിഞ്ഞം സംഘര്‍ഷത്തിൽ തീവ്രസ്വഭാവമുള്ള സംഘടനകള്‍ ഉൾപ്പെട്ടതായി വിവരമില്ലെന്ന്​ ഡി.ഐ.ജി ആർ. നിശാന്തിനി. തീരമേഖലയുടെ സ്​പെഷൽ ഓഫിസറായി ചുമതലയേറ്റ ശേഷം വിഴിഞ്ഞം സ്​റ്റേഷൻ സന്ദർശിക്കുകയായിരുന്നു അവർ. വിഴിഞ്ഞത്ത്​ ഹിന്ദു ഐക്യവേദി മാര്‍ച്ചിന് അനുമതി നൽകിയിട്ടില്ല. സംഘര്‍ഷ മേഖലയില്‍ മാര്‍ച്ച് അനുവദിക്കില്ലെന്നും അവർ മാധ്യമങ്ങളോട്​ പറഞ്ഞു.

പൊലീസ് സ്റ്റേഷന്‍ ആക്രമണവുമായി ബന്ധപ്പെട്ട സംഭവങ്ങളിൽ നിയമനടപടിയുമായി മുന്നോട്ട് പോകും. പ്രതികളെ തിരിച്ചറിയാൻ ശ്രമമാരംഭിച്ചതായും ഡി.ഐ.ജി വ്യക്തമാക്കി.

ഡി.ഐ.ജിയുടെ അധ്യക്ഷതയിൽ പ്രത്യേക അന്വേഷണ സംഘവും ക്രമസമാധാന ചുമതലയുള്ള എസ്​.പി റാങ്കിലുള്ള ​പൊലീസ്​ ഉദ്യോഗസ്ഥരും യോഗം ചേർന്ന്​ സ്ഥിതി വിലയിരുത്തി. ചില കേസുകളിൽ പ്രതിപ്പട്ടികയിൽ ആളുകളുണ്ടെങ്കിലും ചിലതിൽ കണ്ടാലറിയാവുന്ന പ്രതികളാണുള്ളത്​. ഈ കേസുകൾ വിശദമായി അന്വേഷിക്കും.

സ്ഥിതി നിയന്ത്രണവിധേയമാണെന്ന്​ പൊലീസ് ​പറഞ്ഞു. നിരോധനം ലംഘിച്ച്​ നടക്കുന്ന സമരങ്ങളും പ്രതിഷേധങ്ങളും ഉൾപ്പെടെ തടയാൻ ആയിരത്തോളം പൊലീസുകാരെ വിന്യസിച്ചിട്ടുണ്ട്​. ഓരോ കേസും പരിശോധിച്ച്​ അറസ്റ്റ്​ ഉൾപ്പെടെ നടപടികളിലേക്ക്​ കടക്കും.