‘പല തവണ വിഡിയോ കാളും വോയ്സ് കാളും ചെയ്ത് ഡിജിറ്റൽ അറസ്റ്റിലാണെന്ന് വിശ്വസിപ്പിച്ചു’; മലപ്പുറം സ്വദേശിനിയിൽനിന്ന് 93 ലക്ഷം തട്ടിയ കോട്ടയം സ്വദേശി അറസ്റ്റിൽ

മലപ്പുറം: മുംബൈ ക്രൈംബ്രാഞ്ചിലെ ഉദ്യോഗസ്ഥരാണെന്നു പറഞ്ഞ് ഡിജിറ്റൽ അറസ്റ്റ് ഭീഷണി മുഴക്കി എടപ്പാൾ സ്വദേശിനിയിൽനിന്ന് 93 ലക്ഷം രൂപ തട്ടിയെടുത്ത കേസിൽ ഒരാൾ അറസ്റ്റിൽ. കോട്ടയം തലപ്പലം അഞ്ഞൂറ്റിമംഗലം കുന്നുംപുറത്ത് ആൽബിൻ ജോണിനെയാണ് (34)​ മലപ്പുറം സൈബർ പൊലീസ് അറസ്റ്റ് ചെയ്തത്. മലപ്പുറം സൈബർ പൊലീസ് സ്റ്റേഷനിൽ രജിസ്റ്റർ ചെയ്ത കേസിലാണ്​ അറസ്റ്റ്​.

വിവിധ നമ്പറുകളിൽനിന്ന് പരാതിക്കാരിയുടെ മൊബൈലിലേക്ക് വിളിച്ച പ്രതികൾ പരാതിക്കാരിക്കെതിരെ മുംബൈയില്‍ ഒരു കേസ് രജിസ്റ്റർ ചെയ്തിട്ടുണ്ടെന്നാണ്​ ആദ്യം പറഞ്ഞത്​. നിലവിൽ ഉപയോഗിക്കുന്ന മൊബൈൽ നമ്പർ വിവിധ കേസുകളിൽ ഉൾപ്പെട്ട നമ്പർ ആണെന്നും നമ്പർ ഉടനെ റദ്ദാകുമെന്നും ഭീഷണിപ്പെടുത്തി. പൊലീസ്​ ഓഫിസറുടെ വേഷത്തില്‍ വാട്സ്​ ആപ്പിലൂടെ വിഡിയോ കാൾ ചെയ്ത് പരാതിക്കാരിയോട് ആധാർ കാർഡ് കാണിക്കാൻ ആവശ്യപ്പെടുകയും അറസ്റ്റ് വാറന്റുണ്ടെന്നും ഉട​നെ അറസ്റ്റ് ചെയ്യുമെന്നും പറഞ്ഞു. പല പ്രാവശ്യം പ്രതികൾ വിഡിയോ കാളുകളും വോയ്സ് കാളുകളും ചെയ്ത് പരാതിക്കാരി ഡിജിറ്റൽ അറസ്റ്റിലാണെന്ന് പറഞ്ഞ് വിശ്വസിപ്പിച്ച് നിരന്തരം പണം ആവശ്യപ്പെടുകയായിരുന്നുവെന്ന്​ പൊലീസ്​ പറഞ്ഞു.

കേസ് അവസാനിപ്പിക്കുന്നതിന്​ പരാതിക്കാരിയെ നിരന്തരം ഭീഷണിപ്പെടുത്തുകയും വിവിധ ബാങ്ക് അക്കൗണ്ടുകളിൽനിന്നും പ്രതികൾ നൽകിയ അക്കൗണ്ടുകളിലേക്ക് 93 ലക്ഷം രൂപ അയപ്പിക്കുകയും ചെയ്​തെന്നാണ്​ പൊലീസ്​ പറയുന്നത്​. പണം നഷ്ടമായതിനുശേഷമാണ്​ തട്ടിപ്പിനിരയായ സ്​ത്രീ പൊലീസിൽ പരാതി നൽകിയത്​.

ജില്ല പൊലീസ് മേധാവി ആര്‍. വിശ്വനാഥിന്‍റെ നിർദേശപ്രകാരം മലപ്പുറം ഡി.സി.ആര്‍.ബി ഡിവൈ.എസ്​.പി വി. ജയചന്ദ്രന്‍റെ കീഴിൽ സൈബർ ക്രൈം പൊലീസ് സ്റ്റേഷൻ ഇൻസ്പെക്ടർ ചിത്തരഞ്ജന്‍റെ നേതൃത്വത്തിൽ നടത്തിയ സമഗ്രമായ അന്വേഷണത്തിലാണ്​ പ്രതി അറസ്റ്റിലായത്​. സൈബര്‍ പൊലീസ് ടീം എസ്.ഐമാരായ അബ്ദുല്‍ ലത്തീഫ്, കെ.വി.എം. നജുമുദ്ദീന്‍, എ.എസ്.ഐ റിയാസ് ബാബു, സി.പി.ഒമാരായ കൃഷ്ണേന്ദു, മന്‍സൂര്‍ അയ്യോളി, റിജില്‍ രാജ്, വിഷ്ണു ശങ്കര്‍, ജയപ്രകാശ് എന്നിവരാണ്​ അന്വേഷണസംഘത്തിലുള്ള മറ്റ് ഉദ്യോഗസ്ഥർ.