പാഠപുസ്തകങ്ങളുടെ പഴയ പതിപ്പുകൾ ഡിജിറ്റലൈസ് ചെയ്യുന്നു

തിരുവനന്തപുരം: സംസ്ഥാന വിദ്യാഭ്യാസ ഗവേഷണ പരിശീലന സമിതി (എസ്.സി.ഇ.ആർ.ടി) പാഠപുസ്തക ആർക്കൈവ്സ് ഡിജിറ്റലൈസ് ചെയ്യുന്നു. ആദ്യഘട്ടത്തിൽ 1970 മുതൽ പ്രസിദ്ധീകരിച്ച പാഠപുസ്തകങ്ങളാണ് ഡിജിറ്റലൈസ് ചെയ്തു സൂക്ഷിക്കാൻ തീരുമാനിച്ചത്.

വിവിധ കാലങ്ങളിൽ ഓരോ മേഖലയിലുമുണ്ടായ ചരിത്രപരമായ വളർച്ചയും വികാസവും പുതുതലമുറക്ക്​ പകർന്നുനൽകാൻ ഇതിലൂടെ കഴിയുമെന്നാണ് പൊതുവിദ്യാഭ്യാസ വകുപ്പ് പ്രതീക്ഷിക്കുന്നത്. 1970 മുതൽ പ്രസിദ്ധീകരിച്ച എല്ലാ പാഠപുസ്തകങ്ങളും നിലവിൽ എസ്.സി.ഇ.ആർ.ടി ലൈബ്രറിയിൽ ലഭ്യമല്ല. ഈ സാഹചര്യത്തിൽ വിദ്യാഭ്യാസ പ്രവർത്തകരുടെയും ഏജൻസികളുടെയും സഹായം അനിവാര്യമാണ്. നിലവിൽ ലൈബ്രറിയിൽ ലഭ്യമല്ലാത്ത പുസ്തകങ്ങളുടെ വിശദവിവരം എസ്.സി.ഇ.ആർ.ടി വെബ്സൈറ്റിൽ (www.scert.kerala.gov.in) പ്രസിദ്ധീകരിച്ചിട്ടുണ്ട്.

ഈ പുസ്തകങ്ങൾ ആരുടെയെങ്കിലും പക്കലുണ്ടെങ്കിൽ ആ വിവരം scertlibtvpm@gmail.com ലൂടെയോ 9447328908 എന്ന നമ്പറിലൂടെയോ അറിയിക്കണമെന്ന്​ എസ്.സി.ഇ.ആർ.ടി ഡയറക്ടർ ഡോ.ആർ.കെ. ജയപ്രകാശ് അറിയിച്ചു.