ശസ്​ത്രക്രിയക്ക്​ പണമില്ല, കൂടെനിൽക്കാൻ ആളുമില്ല; യാതന നിറഞ്ഞ കാഴ്​ചയായി എള​ങ്കോവൻ ചെട്ടിയാർ

തൃശൂർ: ആരുടേയും സൗജന്യത്തിനായി കൈനീട്ടാതെ പോസ്​റ്റ് ​​ഓഫിസ്​ റോഡിൽ ലോട്ടറി വിറ്റ്​ ജീവിക്കുന്ന പോളിയോ ബാധിതനായ എഴുപതുകാരൻ 50 ദിവസമായി ഭക്ഷണം കഴിക്കാനാകാതെ യാതനയിൽ.

കഴിക്കുന്നതെല്ലാം പുറത്തേക്കുവരുന്നതിനാൽ ശരീരം ശോഷിച്ച്​ ഇടക്കിടെ തളർന്നുവീഴുകയാണ്.​ ബന്ധുക്കളൊന്നും കൂടെയില്ല. മധുര ആറണി സ്വ​ദേശിയാണ്​ എള​ങ്കോവൻ ചെട്ടിയാർ. അന്നനാളത്തിൽ തടസ്സമെന്നാണ്​ തൃശൂർ മെഡിക്കൽ കോളജ്​ ആശുപത്രിയിലെ ഡോക്​ടർ അറിയിച്ചത്​.

ഈ മാസം 21ന്​ വീണ്ടും പരിശോധനക്കെത്തണം. എന്നാൽ, അതുവരെ എന്തുചെയ്യുമെന്ന ആശങ്ക എള​ങ്കോവനെക്കാൾ കൂടുതൽ ഇദ്ദേഹത്തി​െൻറ ബന്ധുവൊന്നുമല്ലാത്ത രേവത്​ ബാബുവിനാണ്​. വരന്തരപ്പിള്ളി സ്വദേശിയായ രേവതിന്​ 10 വർഷം മുമ്പ്​ ലോട്ടറി ഏജൻറായിരിക്കെയുള്ള പരിചയമാണ്​ എള​ങ്കോവനുമായി.

ഇടക്കിടെ ഭക്ഷണവുമായി എത്തുന്നതും കുളിപ്പിക്കാൻ കൊണ്ടുപോകുന്നതും യുവാവായ രേവതാണ്​. വാടകക്ക്​ ഓ​ട്ടോ ഓടിച്ചും ലോട്ടറിവിറ്റും ഉപജീവനം നടത്തുന്ന ഇദ്ദേഹം കോവിഡ്​ കാലത്ത്​ ലോക്​ഡൗൺ പ്രഖ്യാപിച്ചപ്പോൾ എള​​ങ്കോവനെ ത​െൻറ വീട്ടിൽ ആറുമാസം താമസിപ്പിക്കുകയും ചെയ്​തു.

ഛർദി കലശലായതോടെ പാലും ചായയും മാത്രമാണ്​ എള​​ങ്കോവന്​ നൽകുന്നത്​. ശനിയാഴ്​ചയും രേവത്​​ ഡോക്​ടറെ കാണിക്കാൻ കൊണ്ടുപോയിരുന്നു​. ബി.പി.എൽ കാർഡില്ലാത്തതിനാൽ എള​​ങ്കോവന്​ ചികിത്സാസൗജന്യമില്ല. ശസ്​ത്രക്രിയ ആവശ്യമായാൽ ബന്ധുക്കളുടെ സാക്ഷ്യപത്രം വേണ്ടിവരും.

പണച്ചെലവും വന്നേക്കും. ഇതിനെല്ലാമുപരി ആശുപത്രിയിൽ മുഴുവൻ സമയംചെലവിടാൻ തനിക്കാവില്ലെന്നതാണ്​​ രേവതിനെ സങ്കടപ്പെടുത്തുന്നത്​. കാരണം, ഇദ്ദേഹവും അമ്മയുമടങ്ങുന്ന കുടുംബം അമ്മാവ​െൻറ വീട്ടിലാണ്​ താമസം. കുടുംബപ്രാരാബ്​ധവു​ം ഏറെയുണ്ട്​. ചികിത്സാസഹായത്തി​ന്​ സുമനസ്സുകളെത്തുമെന്നാണ്​ രേവതി​െൻറയും എള​ങ്കോവ​െൻറയും പ്രതീക്ഷ. 40 വർഷമായി തൃശൂരിൽ ലോട്ടറിവിൽപനയിലുള്ള എള​ങ്കോവൻ ചെട്ടിയാരുടെ ജീവിതം നാടകീയത നിറഞ്ഞതാണ്​​.

ചെറുപ്പത്തിലേ അമ്മ മരിച്ചതോടെ രണ്ടാനമ്മ ഇദ്ദേഹത്തെ ഭിന്നശേഷികേന്ദ്രത്തിലാക്കി. എന്നാൽ, അധ്വാനിച്ച്​ ജീവിക്കുമെന്ന തീരുമാനത്തിൽ നാട്​ വിട്ടു. അങ്ങനെയാണ്​ ആലുവയിലും തുടർന്ന്​ തൃശൂരിലുമെത്തിയത്​.