യോഗ്യത കൂടുതലുണ്ടോ? ശമ്പളം കുറയും!

തൃശൂർ: യോഗ്യത കൂടിയാൽ ശമ്പളം കുറയും. സംസ്ഥാനത്തെ പോളിടെക്​നിക്​ കോളജുകളിലെ അധ്യാപകർക്കാണ്​ ഈ ദുരവസ്ഥ. 2013ൽ പോളിടെക്​നിക്കുകളിൽ ഓൾ ഇന്ത്യ കൗൺസിൽ ഫോർ ടെക്​നിക്കൽ എജുക്കേഷന്‍റെ പദ്ധതി നടപ്പാക്കിയതോടെയാണ്​ ബി.ടെക്കും എം.ടെക്കും ഉയർന്ന മാർക്കോടെ പാസായവരും പിഎച്ച്​.ഡി നേടിയവരുമായ അധ്യാപകർ ശമ്പളത്തിൽ താഴെയും ഡിപ്ലോമ നേടിയവരും മറ്റും മുകളിലുമായത്​.

ഇപ്പോഴും പരിഹരിക്കപ്പെടാത്ത ഈ പ്രശ്​നം തങ്ങളുടെ അന്തസ്സിന്​ മുറിവേൽപ്പിക്കുന്നതാണെന്ന്​ കേരള പോളിടെക്​നിക്​ കോളജ്​ ലക്​ചറേഴ്​സ്​ അസോസിയേഷൻ ഭാരവാഹികൾ വാർത്തസമ്മേളനത്തിൽ പറഞ്ഞു.

എ.ഐ.സി.ടി.ഇ നിഷ്കർഷിച്ച യോഗ്യതയുള്ളവരെ പുതിയ സ്കീമിലേക്ക്​ നിർബന്ധിച്ച്​ മാറ്റുകയും ഇല്ലാത്തവരെ സംസ്ഥാന സർക്കാർ സ്​കെയിലിൽ നിലനിർത്തുകയും ചെയ്തപ്പോഴാണ്​ ഈ ദുരവസ്ഥ നേരിട്ടത്​. ഇതിന്​ തയാറാക്കിയ പട്ടികയിലെ അപാകതയാണ്​ പ്രശ്​നത്തിന്​ ഇടയാക്കിയത്​. ഇതുമൂലം ദീർഘകാലം ജോലി ചെയ്തിടും പല ലെക്​ചറർമാരും വിരമിക്കുന്നത്​ ചുരുങ്ങിയ അടിസ്ഥാന ശമ്പളത്തിലും കുറഞ്ഞ പെൻഷൻ ആനുകൂല്യം വാങ്ങിയുമാണ്​.

2013ൽ നടപ്പാക്കേണ്ട കരിയർ അഡ്വാൻസ്​മെന്‍റ്​ സ്​കീമും നടപ്പാക്കിയില്ല. 2016 മുതൽ ലഭിക്കേണ്ട ഏഴാം ശമ്പള പരിഷ്കരണം അനുസരിച്ചുള്ള ആനുകൂല്യങ്ങൾ ഇതുവരെ പോളിടെക്​നിക്​ ലെക്​ചറർമാർക്ക്​ നൽകിയിട്ടില്ല. പല കാര്യത്തിലും ബന്ധപ്പെട്ട ഉദ്യോഗസ്ഥർ തടസ്സം നിൽക്കുകയാണെന്ന്​ ഭാരവാഹികൾ പറഞ്ഞു.

അസോസിയേഷ​െൻറ പ്രഥമ സംസ്ഥാന സമ്മേളനം ബുധനാഴ്ച തൃശൂർ സി.എം.എസ്​ സ്കൂൾ ഓഡിറ്റോറിയത്തിൽ നടക്കും. രാവിലെ 10ന്​ പി. ബാലചന്ദ്രൻ എം.എൽ.എ ഉദ്​ഘാടനം ചെയ്യും. പ്രതിനിധി സമ്മേളനം 11ന്​ സംസ്ഥാന പ്രസിഡന്‍റ്​ ലിജോ ജോണിന്‍റെ അധ്യക്ഷതയിൽ ചേരും. പൊതുസമ്മേളനം ഉച്ചക്ക്​ രണ്ടിന്​ ടി.എൻ. പ്രതാപൻ എം.പി ഉദ്​ഘാടനം ചെയ്യും.

ലിജോ ജോൺ, ജനറൽ സെക്രട്ടറി എം.പി. സതീശൻ, സംഘാടക സമിതി കൺവീനർ ഓസ്റ്റിൻ ആന്‍റണി, എക്​സി. അംഗങ്ങളായ ജിന്‍റോ ഫ്രാൻസിസ്​, സുഷമ എന്നിവർ വാർത്തസമ്മേളനത്തിൽ പങ്കെടുത്തു.