അനുപമയുടെ കുഞ്ഞിന്‍റെ ജനന രജിസ്റ്റർ അടക്കമുള്ള രേഖകൾ കസ്റ്റഡിയിലെടുത്തു

തിരുവനന്തപുരം: അമ്മ അറിയാതെ ദത്ത് നൽകിയ സംഭവുമായി ബന്ധപ്പെട്ട നിർണായക രേഖകൾ അന്വേഷണ സംഘം കസ്റ്റഡിയിലെടുത്തു. അനുപമ കുഞ്ഞിന് ജന്മം നൽകിയ കാട്ടാക്കട സ്വകാര്യ ആശുപത്രിയിലെയും ജനനം രജിസ്റ്റർ ചെയ്ത കാട്ടാക്കട ഗ്രാമപഞ്ചായത്തിലെയും രേഖകളാണ് കസ്റ്റഡിയിലെടുത്തത്.

കുഞ്ഞിനെ ദത്ത് നൽകിയതുമായി ബന്ധപ്പെട്ട് വിവരങ്ങൾ കൈമാറാൻ സി.ഡബ്ല്യു.സിയോടും അഡോപ്ഷൻ റിസോഴ്സ് ഏജൻസിയോടും പൊലീസ് ആവശ്യപ്പെട്ടിരുന്നു. വരും ദിവസങ്ങളിൽ വിവരങ്ങൾ ലഭിക്കുമെന്നാണ് അന്വേഷണ സംഘത്തിന്‍റെ കണക്കുകൂട്ടൽ.

അനുപമയുടെ കുഞ്ഞി​ന്‍റെ ജനന സര്‍ട്ടിഫിക്കറ്റിൽ തിരിമറി നടന്നതി​െൻറ രേഖകൾ കഴിഞ്ഞ ദിവസം പുറത്തു വന്നിരുന്നു. കുഞ്ഞി​ന്‍റെ പിതാവി​െൻറ പേരും മേല്‍വിലാസവും തെറ്റായാണ് ജനന സര്‍ട്ടിഫിക്കറ്റില്‍ രേഖപ്പെടുത്തിയിരിക്കുന്നത്​. പിതാവ്​ അജിത്തി​െൻറ പേരിന് പകരം ജയകുമാര്‍ എന്നാണ്​ സർട്ടിഫിക്കറ്റിൽ നല്‍കിയിരിക്കുന്നത്.

കവടിയാര്‍ കുറവന്‍കോണം സ്വദേശിയാണ് അജിത്ത്​. എന്നാല്‍, ജനനസര്‍ട്ടിഫിക്കറ്റില്‍ നല്‍കിയിരിക്കുന്നത് തിരുവനന്തപുരം മണക്കാടുള്ള ഒരു മേല്‍വിലാസമാണ്. കാട്ടാക്കടയിലുള്ള സ്വകാര്യ ആശുപത്രിയിലാണ് അനുപമ 2020 ഒക്ടോബര്‍ 19ന് ആണ്‍കുട്ടിക്ക് ജന്മം നല്‍കിയത്.

അവിടെ നല്‍കിയ വിവരങ്ങളുടെ അടിസ്ഥാനത്തിലാണ് കാട്ടാക്കട ഗ്രാമപഞ്ചായത്ത് ജനന സര്‍ട്ടിഫിക്കറ്റ് നല്‍കിയത്. പഞ്ചായത്ത് നല്‍കിയ ജനനസര്‍ട്ടിഫിക്കറ്റില്‍ കുട്ടിയുടെ മാതാവി​െൻറ പേരി​െൻറ സ്ഥാനത്ത് അനുപമ എസ്. ചന്ദ്രന്‍ എന്ന് കൃത്യമായിത്തന്നെ രേഖപ്പെടുത്തിയിട്ടുണ്ട്.

2020 ഒക്ടോബര്‍ 22ന് പ്രസവിച്ച ശേഷം ആശുപത്രിയിൽ നിന്ന്​ മടങ്ങും വഴി ജഗതിയില്‍ വെച്ച് ത‍​ന്‍റെ മാതാപിതാക്കൾ ചേര്‍ന്ന് കു‍ഞ്ഞിനെ ബലമായി എടുത്തു കൊണ്ടുപോയി എന്നായിരുന്നു മുൻ എസ്.എഫ്.ഐ നേതാവ് കൂടിയായ അനുപമയുടെ പരാതി.

അനുപമയുടെ പിതാവും സി.​പി.​എം പേ​രൂ​ർ​ക്ക​ട ലോ​ക്ക​ൽ ക​മ്മി​റ്റി അം​ഗ​വു​മാ​യ പി.​എ​സ്. ജ​യ​ച​ന്ദ്ര​ന്‍, മാ​താ​വും സി.​പി.​എം ബ്രാ​ഞ്ച് ക​മ്മി​റ്റി അം​ഗ​വു​മാ​യ സ്മി​താ ജ​യിം​സ്, അ​നു​പ​മ​യു​ടെ സ​ഹോ​ദ​രി അ​ഞ്ജു, സ​ഹോ​ദ​രീ ഭ​ർ​ത്താ​വ് അ​രു​ൺ, ജ​യ​ച​ന്ദ്രന്‍റെ സു​ഹൃ​ത്തു​ക്ക​ളും സി.​പി.​എം പ്രാ​ദേ​ശി​ക നേ​താ​ക്ക​ളു​മാ​യ ര​മേ​ശ​ൻ, അ​നി​ൽ​കു​മാ​ർ എ​ന്നി​വ​ർ​ക്കെ​തി​രാണ് കേസെടുത്തത്.