ചാരക്കേസ്​: നമ്പി നാരായണ​െൻറ നഷ്​ടപരിഹാരം വർധിപ്പിക്കണമെന്ന്​ സുപ്രീംകോടതി

ന്യൂഡൽഹി: നമ്പി നാരായണന്​ നീതി ഉറപ്പുവരുത്തണമെന്നും നഷ്​ടപരിഹാരം വർധിപ്പിക്കണമെന്നും സുപ്രീംകോടതി. ഐ.എസ്.ആർ.ഒ ചാരക്കേസ് അന്വേഷിച്ച ഉദ്യോഗസ്ഥർക്ക് എതിരെ നടപടി ആവശ്യപ്പെട്ട് നമ്പി നാരായണൻ നൽകിയ ഹരജി സുപ്രീംകോടതി വിധി പറയാനായി മാറ്റിയ വേളയിലാണ്​ കോടതി ബെഞ്ച്​ ഇങ്ങനെ അഭിപ്രായപ്പെട്ടത്​. സുപ്രീംകോടതിയുടെ മേൽനോട്ടത്തിൽ അന്വേഷണത്തിന്​ തയാറാണെന്ന്​ സി.ബി.​െഎ അറിയിച്ചതിന്​ പിന്നാലെ വാദം കേൾക്കൽ അവസാനിപ്പിച്ച്​ ചീഫ്​ ജസ്​റ്റിസ്​ അധ്യക്ഷനായ ബെഞ്ച്​ കേസ്​ വിധിപറയാനായി മാറ്റുകയായിരുന്നു.

ചാരക്കേസ്​ സി.ബി.​െഎ ഉദ്യോഗസ്​ഥർ ഉൾ​െപ്പട്ട കേസാണെങ്കിലും ഏജൻസിയെന്ന നിലയിൽ അ​േന്വഷണത്തെ ഭയക്കുന്നി​െല്ലന്ന്​ സി.ബി.​െഎ അഭിഭാഷകൻ വാദിച്ചു. ഇത്​ കോടതിയുടെ മേൽനോട്ടത്തിൽ തന്നെയാകണമെന്നും അഭിഭാഷകൻ ബോധിപ്പിച്ചു.സത്യസന്ധനായ ഉദ്യോഗസ്​ഥനാണ്​ സിബി മാത്യുസ്​ എന്നും വിവരാവകാശ​ കമീഷണർ വരെയായി പ്രവർത്തിച്ച ചരിത്രം നോക്കിയാൽ ഇത്​ ബോധ്യമാകുമെന്നും അദ്ദേഹത്തി​​​െൻറ അഭിഭാഷകൻ വാദിച്ചു. ഇനിയൊരന്വേഷണം അപമാനിക്കാനാണെന്നും അഭിഭാഷകൻ കൂട്ടിച്ചേർത്ത​ു.

നഷ്​ടപരിഹാരം തങ്ങൾ നൽകേണ്ടതുണ്ടോ എന്ന നമ്പി നാരായണ​​​െൻറ എതിർകക്ഷികളുടെ ചോദ്യത്തിന്​ നഷ്​ടപരിഹാരം എന്തുകൊണ്ട്​ നിങ്ങൾക്ക്​ നൽകിക്കൂടാ എന്ന്​ ബെഞ്ച്​ തിരിച്ചുചോദിച്ചു. നഷ്​ടപരിഹാരം നമ്പി നാരായണന്​ എങ്ങനെ ലഭ്യമാക്കുമെന്ന കാര്യത്തിൽ സംസ്​ഥാന സർക്കാർ തീരുമാനമെടുക്ക​െട്ട എന്ന്​ ചീഫ്​ ജസ്​റ്റിസ്​ ദീപക്​ മിശ്ര പറഞ്ഞു.

എന്തുതന്നെയായാലും നമ്പി നാരായണന് നീതി ലഭിക്കേണ്ടതുണ്ടെന്നും അന്വേഷണം ഏതുനിലക്ക്​ വേണമെന്ന് തീരുമാനമെടുക്കേണ്ടിയിരിക്കുന്നുവെന്നും ജസ്​റ്റിസ്​ ചന്ദ്രചൂഡ് അഭിപ്രായപ്പെട്ടു. കേസിനായി 19ാം തവണയാണ്​ ഡൽഹിയിൽ വരുന്നതെന്ന്​ നമ്പി നാരായണൻ​ കോടതിക്കുപുറത്ത് ​പറഞ്ഞു. ഇൗ കേസിനുള്ള അവസാനത്തെ വരവായിരിക്കു​മിതെന്നാണ്​ കരുതുന്നതെന്നും നീതി ലഭിക്കുമെന്നാണ്​ പ്രതീക്ഷ​യെന്നും നമ്പി നാരായണൻ പറഞ്ഞു.