ഡോ. വന്ദന ദാസ്​ വധം: കുറ്റപത്രം വായിക്കുന്നത് ഹൈകോടതി തടഞ്ഞു

കൊച്ചി: കൊട്ടാരക്കര താലൂക്ക് ആശുപത്രിയിലെ ഹൗസ്‌ സർജനായിരുന്ന ഡോ. വന്ദന ദാസ്​ വധക്കേസിലെ കുറ്റപത്രം വായിക്കുന്നത് ഹൈകോടതി തടഞ്ഞു. വിചാരണ നടപടികൾ തുടങ്ങുന്നതിന്‍റെ ഭാഗമായി വെള്ളിയാഴ്ച കുറ്റപത്രം വായിച്ചുകേൾപ്പിക്കാനിരിക്കെയാണ് പ്രതി സന്ദീപ് നൽകിയ പുനഃപരിശോധന ഹരജി പരിഗണിച്ച്​ ജസ്റ്റിസ് എ. ബദറുദ്ദീന്‍റെ ഇടക്കാല ഉത്തരവ്​. കേസ് ഡയറി ഹാജരാക്കാനും നിർദേശിച്ചു.

2023 മേയ് 10ന് വൈദ്യപരിശോധനക്കായി പൊലീസ്​ ഹാജരാക്കിയപ്പോഴാണ് ഡോ. വന്ദനയെ സന്ദീപ് കുത്തിക്കൊലപ്പെടുത്തിയത്. കരുതിക്കൂട്ടിയുള്ള കൃത്യ​മല്ലാത്തതിനാൽ കൊലപാതകക്കുറ്റം ചുമത്താനാകില്ലെന്നും കുറ്റവിമുക്തനാക്കണമെന്നും ആവശ്യപ്പെട്ട് നൽകിയ ഹരജി കൊല്ലം അഡീ. സെഷൻസ്​ കോടതി തള്ളിയതിനെത്തുടർന്നാണ്​ ഹൈകോടതിയെ സമീപിച്ചത്​.

പൊലീസിന്റെയും ആശുപത്രി അധികൃതരുടെയും വീഴ്ചയാണ് ഡോ. വന്ദനയുടെ മരണത്തിന് കാരണമെന്ന്​ ഹരജിയിൽ പറയുന്നു. ഹരജി വീണ്ടും 18ന് പരിഗണിക്കാൻ മാറ്റി.