ഷൂട്ടിങ്​ പരിശീലനത്തിനിടെ വെടിയുണ്ട​ ഉന്നംതെറ്റി സമീപ വീട്ടിലേക്ക്​

കോട്ടയം: റൈഫിൾ അസോസിയേഷന്‍റെ ഷൂട്ടിങ്​ റേഞ്ചിൽ പൊലീസ്​ പരിശീലനം നടക്കുന്നതിനിടെ ഉന്നംതെറ്റിയ വെടിയുണ്ട സമീപവീട്ടിലെ ജനൽ ചില്ലിൽ തറച്ചുകയറി. തലനാരിഴക്കാണ്​ മുറിയിലിരുന്ന്​ പഠിക്കുകയായിരുന്ന ഒമ്പതാം ക്ലാസ്​ വിദ്യാർഥിനി രക്ഷപ്പെട്ടത്​. നാട്ടകം പോളിടെക്​നിക്കിനു സമീപം ബിന്ദു നഗറിൽ ഉള്ളാട്ടിൽ ജേക്കബിന്‍റെ വീടിന്‍റെ പിൻവശത്തെ ജനലിലേക്കാണ് വെടിയുണ്ട പതിച്ചത്. ഇവിടെ വാടകക്ക്​ താമസിക്കുകയാണ്​ സോണി.

ജനൽ ചില്ല്​ തുളച്ച വെടിയുണ്ട​ മുറിക്കകത്താണ്​ വീണത്​. ശനിയാഴ്ച രാവിലെ 10.30യോടെയാണ്​ സംഭവം. രാവിലെ ഏഴര മുതൽ റേഞ്ചിൽ പരിശീലനം നടക്കുന്നുണ്ടായിരുന്നു. സോണിയുടെ മകൾ അൽക്ക അകത്തെ മുറിയിലിരുന്ന്​ പഠിക്കുകയായിരുന്നു. ജനലിൽ എന്തോ വന്നടിക്കുന്ന ശബ്​ദം കേട്ട്​ നോക്കിയപ്പോഴാണ്​ ജനൽ ചില്ല്​​ തുളച്ചുവന്ന​ വെടിയുണ്ട ക​ണ്ടെത്തിയത്​. ഉടൻ ഷൂട്ടിങ്​ റേഞ്ചിലെത്തി അവരോട്​ വിവരം പറഞ്ഞു.

ആരും എത്താതിരുന്നതോടെ ചിങ്ങവനം പൊലീസിൽ അറിയിച്ചു. പൊലീസ് സ്ഥലത്തെത്തി നടത്തിയ പരിശോധനയിൽ വെടിയുണ്ട കല്ലിൽ തട്ടി ദിശ മാറി എത്തിയതാണെന്ന്​ കണ്ടെത്തി. പിന്നീട്​ ഷൂട്ടിങ്​ പരിശീലനം നടത്തിയിരുന്നവരും എത്തി​. ജനൽ ശരിയാക്കി നൽകാമെന്ന്​ ഇവർ വീട്ടുകാരെ അറിയിച്ചു.

ഷൂട്ടിങ്​ പരിശീലനം നിർത്തിവെക്കുകയും ചെയ്തു. ഇവരുടെ വീടിനോട്​ ചേർന്നാണ്​ തുറന്ന ഷൂട്ടിങ്​ റേഞ്ച്​. നിരവധി വീടുകളും പോളിടെക്നിക്കും സമീപത്തുണ്ട്​. ജനങ്ങൾ താമസിക്കുന്ന സ്ഥലത്ത്​ മുൻകരുതലില്ലാതെ ഷൂട്ടിങ്​ പരിശീലനം നടത്തിയതാണ്​ അപകടത്തിന്​ ഇടയാക്കിയതെന്ന്​ നാട്ടുകാർ ആരോപിക്കുന്നു. രണ്ടുവർഷം മുമ്പ് പരിശീലനത്തിനിടെ രണ്ടു ബുള്ളറ്റ്​ വ്യാപാരസ്ഥാപനത്തിൽ പതിച്ചത്​ വിവാദമായിരുന്നു. അന്നും ഷൂട്ടിങ്​ റേഞ്ച്​ മാറ്റണമെന്ന ആവശ്യം നാട്ടുകാർ ഉന്നയിച്ചിരുന്നു​.