ഇന്ത്യ വീണ്ടും കൊല്ലപ്പെ​ട്ടെന്ന്​ റിയാസ്​; ബി.ജെ.പിക്കും കോൺഗ്രസ്സിനും മാപ്പില്ലെന്ന്​ റഹീം

തിരുവനന്തപുരം: ബാബരി മസ്ജിദ് തകർത്ത കേസിൽ ഗൂഢാലോചനക്ക് തെളിവില്ലെന്ന് സി.ബി.ഐ പ്രത്യേക കോടതി വിധി വന്നതിന്​ പിന്നാലെ പ്രതികരണവുമായി ഡി.വൈ.എഫ്​​.ഐ. ഇന്ത്യ വീണ്ടും കൊല്ലപ്പെ​ട്ടെന്ന്​ ഡി.വൈ.എഫ്​.ഐ ദേശീയ പ്രസിഡൻറ്​ മുഹമ്മദ്​ റിയാസ്​ പ്രതികരിച്ചു. എന്നാൽ ബി.ജെ.പിക്കൊപ്പം കോൺഗ്രസിനെയും കടന്നാക്രമിച്ചാണ്​ ഡി.വൈ.എഫ്​.ഐ സംസ്ഥാന പ്രസിഡൻറ്​ എ.എ റഹീം പ്രതികരിച്ചത്​.

വിധി മത നിരപേക്ഷ ഇന്ത്യയുടെ മരണ മണിയാണെന്നും ബാബരി മസ്ജിദ് തകർത്ത കേസ് അട്ടിമറിച്ചതിൽ ഒന്നാം പ്രതി കോൺഗ്രസാണെന്നും എ.എ റഹീം പ്രതികരിച്ചു. ബിജെപിക്കും കോൺഗ്രസ്സിനും മാപ്പില്ലെന്നും എ.എ റഹീം കൂട്ടിച്ചേർത്തു. വിധി നീതിനിഷേധമെന്നായിരുന്നു എളമരം കരീം എം.പിയുടെ പ്രതികരണം.