എയ്​ഡഡ്​ സ്കൂളുകളിലെ ഭിന്നശേഷി സംവരണത്തിൽ കൂടുതൽ കുരുക്കുകളഴിച്ച്​ വിദ്യാഭ്യാസ വകുപ്പ്; കോടഞ്ചേരിയിലെ​ അധ്യാപികയുടെ ആത്മഹത്യക്ക് പിന്നാലെയാണ് നടപടി

തിരുവനന്തപുരം: സംസ്ഥാനത്തെ എയ്​ഡഡ്​ സ്കൂളുകളിലെ ഭിന്നശേഷി സംവരണവുമായി ബന്ധപ്പെട്ട കൂടുതൽ കുരുക്കുകളഴിച്ച്​ വിദ്യാഭ്യാസ വകുപ്പ്​. നിയമനാംഗീകാരം നിരസിക്കപ്പെട്ടതിനെ തുടർന്ന് കോഴിക്കോട്​ കോടഞ്ചേരിയിൽ​ അധ്യാപിക ആത്മഹത്യ ചെയ്ത സംഭവത്തിന്​ പിന്നാലെയാണ്​ ഉത്തരവിറങ്ങിയത്​.

എയ്​ഡഡ്​ സ്കൂളുകളിൽ ഭിന്നശേഷി നിയമനവുമായി ബന്ധപ്പെട്ട്​ ശമ്പള സ്​കെയിലിൽ താൽക്കാലിക നിയമനാംഗീകാരം നൽകിയ അധ്യാപക, അനധ്യാപക ജീവനക്കാർക്ക്​ ഗ്രൂപ്​ ഇൻഷുറൻസിൽ അംഗത്വമെടുക്കാൻ അനുമതി നൽകിയാണ്​ പൊതുവിദ്യാഭ്യാസ ഡയറക്ടറുടെ പുതിയ ഉത്തരവ്​.

ഇവർക്ക്​ നേരത്തെ പെർമനൻഡ്​​ എം​േപ്ലായീ നമ്പർ (പെൻ) അനുവദിക്കാനും പി.എഫ്​ അക്കൗണ്ട്​ തുടങ്ങാനും അനുമതി നൽകിയിരുന്നു. സർക്കാർ നിർദേശങ്ങൾക്കനുസൃതമായി ഭിന്നശേഷി നിയമനം നടത്തിയ എയ്​ഡഡ്​ സ്കൂളുകളിലെ മറ്റ്​ നിയമനങ്ങൾ റെഗുലറായി ക്രമീകരിക്കാനുള്ള നടപടികൾ സ്വീകരിക്കാൻ വിദ്യാഭ്യാസ ഓഫിസർമാർക്ക്​ നിർദേശവും നൽകിയിട്ടുണ്ട്​.

ഇതിൽ വീഴ്ച വരുത്തുന്നത്​ കൃത്യവിലോപമായി കരുതുമെന്നും സർക്കുലറിൽ പറയുന്നു. താൽക്കാലികമായി നിയമനാംഗീകാരം ലഭിച്ച ജീവനക്കാരുള്ള സ്കൂളുകളിൽ/അതേ​ മാനേജ്​മെന്‍റിന്‍റെ കീഴിലുള്ള മറ്റ്​ സ്കൂളുകളിൽ ഉയർന്ന തസ്തികയിൽ ഒഴിവുണ്ടാകുമ്പോൾ, സീനിയോറിറ്റി പ്രകാരം താൽക്കാലിക നിയമനാംഗീകാരം ലഭിച്ചവർക്കാണ്​ അർഹതയെങ്കിൽ താൽക്കാലിക നിയമനാംഗീകാരവും അതേ തസ്തികയിലെ ശമ്പളവും അനുവദിക്കാനും നിർദേശിച്ചിട്ടുണ്ട്​.

ഇതുവഴിയുണ്ടാകുന്ന ഒഴിവിലേക്ക്​ ഒഴിവുവരുന്ന തീയതി പരിഗണിച്ച്​ താൽക്കാലികമായോ/ദിവസവേതനാടിസ്ഥാന​ത്തിലോ ബാധകമായ രീതിയിൽ പരിണിച്ച്​ നിയമനാംഗീകാരം നൽകാനും സർക്കുലറിൽ നിർദേശിക്കുന്നു. ഈ വിഷയത്തിൽ ഇതിനകം നിരസിക്കപ്പെട്ടതോ അപ്പീൽ പരിഗണനയിൽ ഉള്ളതോ ആയ എല്ലാ കേസുകളും മറ്റൊരു അപ്പലേറ്റ്​ ഉത്തരവിന്​ കാത്തിരിക്കാതെ നിയമാനുസൃതം പുനഃപരിശോധിച്ച്​ അർഹമായ തീർപ്പുകൽപ്പിക്കണമെന്നും ഡയറക്ടർ ഉത്തരവിട്ടു.