എം. സി റോഡിൽ വാളകത്ത് കാറും മിനി ലോറിയും കൂട്ടിയിടിച്ച് വൃദ്ധദമ്പതികൾ മരിച്ചു

കൊട്ടാരക്കര: എം.സി റോഡിൽ വാളകത്ത് കാറും മിനി ലോറിയും കൂട്ടിയിടിച്ചുണ്ടായ അപകടത്തിൽ വൃദ്ധദമ്പതികൾ മരിച്ചു. തിരുവനന്തപുരം പി.റ്റി ചാക്കോ നഗറിൽ താമസക്കാരനായ കോട്ടയം വാഗത്താനം സ്വദേശി തോമസ് കുട്ടി (75), ഭാര്യ ശാന്തമ്മ തോമസ് (71) എന്നിവരാണ് മരിച്ചത്. ഞായറാഴ്ച പുലർച്ചെയാണ് അപകടം നടന്നത്.

തിരുവനന്തപുരത്ത് നിന്ന് കോട്ടയത്തേക്ക് പോവുകയായിരുന്ന വൃദ്ധ ദമ്പതികൾ സഞ്ചരിച്ചിരുന്ന കാർ കൊട്ടാരക്കര ഭാഗത്ത്‌ നിന്നും ആയൂർ ഭാഗത്തേക്ക്‌ വരുകയായിരുന്ന മിനി ലോറിയുമായി കൂട്ടിയിടിക്കുകയായിരുന്നു . ഇടിയുടെ ആഘാതത്തിൽ കാറിന്റെ മുൻ ഭാഗം പൂർണ്ണമായും തകർന്നു. സമീപത്തെ എയ്ഡ് പോസ്റ്റിൽ നിന്നും ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥർ ഓടിയെത്തി വാഹനം വെട്ടി പൊളിച്ച് ഇരുവരെയും പുറത്തെടുത്തെങ്കിലും രക്ഷിക്കാനായില്ല.

മൃതദേഹങ്ങൾ കൊട്ടാരക്കര താലൂക്കാശുപത്രി മോർച്ചറിയിൽ. മകൻ : ടോം തോമസ്. മരുമകൾ : ഷാരോൺ ടോം. കൊട്ടാരക്കര പോലീസ് കേസെടുത്തു.

സംസ്കാരം ചൊവ്വാഴ്ച ഉച്ചയ്ക്ക് വാകത്താനം സെന്റ് ജോൺസ് ഓർത്തഡോക്സ് വലിയ പള്ളി ചർച്ച് സെമിത്തേരിയിൽ.