മകന്‍റെ കു​ത്തേറ്റ്​ വയോധികൻ​ മരിച്ചു; ലഹരി ഉപയോഗം ചോദ്യം ചെയ്തതാണ് പ്രകോപനം

കോട്ടയം: കോട്ടയം കുമാരനല്ലൂരിൽ മകന്‍റെ കു​ത്തേറ്റ്​ വയോധികൻ​ മരിച്ചു. കുമാരനല്ലൂർ മേൽപാലത്തിനു സമീപം ഇടയാടിയിൽ താഴത്ത് വരിക്കതിൽ രാജുവാണ്​ (70) മരിച്ചത്​. മകൻ അശോകനെ (42) എസ്​.എച്ച്​.ഒ ടി. ശ്രീജിത്തിന്റെ നേതൃത്വത്തിൽ പൊലീസ്​ അറസ്റ്റ് ചെയ്തു. ചൊവ്വാഴ്ച ഉച്ചക്ക്​ 11.45നാണ്​ സംഭവം.

അശോകൻ ലഹരിക്ക്​ അടിമയായിരുന്നെന്നും രാജു ഇത്​ ചോദ്യം ചെയ്തതാണ് പ്രകോപനത്തിന്​ കാരണമെന്നും പറയുന്നു. വീടിനകത്ത്​ ശബ്ദവും ബഹളവുംകേട്ട് ഓടിക്കൂടിയ നാട്ടുകാരാണ് വിവരം ഗാന്ധിനഗർ പൊലീസിൽ അറിയിച്ചത്.

സംഭവസമയത്ത് രാജുവും അശോകനും മാത്രമാണ് വീട്ടിലുണ്ടായിരുന്നത്. മാനസികാസ്വസ്ഥത പ്രകടിപ്പിച്ച അശോകനെ പത്തോളം പൊലീസ് ഉദ്യോഗസ്ഥർ ചേർന്ന്​ കസ്റ്റഡിയിലെടുക്കുകയായിരുന്നു. വീടിന്‍റെ പിൻഭാഗത്താണ് മൃതദേഹം കിടന്നിരുന്നത്​​. രാജുവിന്‍റെ മൃതദേഹം മെഡിക്കൽ കോളജ് ആശുപത്രി മോർച്ചറിയിലേക്ക്​ മാറ്റി.

രാജുവിന്‍റെ ഭാര്യയും ഒരു മകളും ആരോഗ്യസ്ഥിതി മോശമായതിനാൽ അഭയകേന്ദ്രത്തിലാണ്​. മറ്റൊരു മകൾ വിവാഹിതയും. ചിത്രകാരനായ അശോകന്‍റെ ഭാര്യ വിദേശിയാണ്​.