പെരിന്തൽമണ്ണ തെരഞ്ഞെടുപ്പ്​ ഹരജി: തപാൽ വോട്ടുകളുടെ പാക്കറ്റുകൾ കീറിയിരുന്നെന്ന്​ തെരഞ്ഞെടുപ്പ്​ കമീഷൻ

കൊച്ചി: പെരിന്തൽമണ്ണ നിയമസഭ മണ്ഡലത്തിലെ തപാൽ വോട്ടുകളടങ്ങിയ പാക്കറ്റുകൾ കീറിയ നിലയിൽ ക​ണ്ടെത്തിയതായി തെരഞ്ഞെടുപ്പ്​ കമീഷൻ ഹൈകോടതിയിൽ. നാലാം നമ്പർ മേശയിലെ അസാധുവായ തപാൽ വോട്ടുകളുണ്ടായിരുന്ന രണ്ട്​ പാക്കറ്റുകളിൽ ഒന്നിന്‍റെ പുറത്തെ കവർ കീറിയ നിലയിലാണെന്നും കമീഷൻ സീനിയർ പ്രിൻസിപ്പൽ സെക്രട്ടറി നരേന്ദ്ര എൻ. ബുട്ടോലിയ ഹൈകോടതിയിൽ നൽകിയ റിപ്പോർട്ടിൽ പറയുന്നു. ഇക്കാര്യത്തിൽ നാല്​ ഉദ്യോഗസ്ഥർക്ക്​ വീഴ്ചയുണ്ടായി​. പെരിന്തൽമണ്ണയിൽനിന്ന് മുസ്​ലിം ലീഗ് സ്ഥാനാർഥി നജീബ് കാന്തപുരത്തിന്‍റെ തെരഞ്ഞെടുപ്പ്​ റദ്ദാക്കണമെന്ന്​ ആവശ്യപ്പെട്ട്​ തൊട്ടടുത്ത എതിർ സ്ഥാനാർഥി കെ.പി. മുഹമ്മദ് മുസ്‌തഫ നൽകിയ ഹരജിയുമായി ബന്ധപ്പെട്ടാണ്​ തെരഞ്ഞെടുപ്പ്​ കമീഷന്‍റെ റിപ്പോർട്ട്​.

മണ്ഡലത്തിലെ 340 പോസ്റ്റൽ വോട്ട്​ സാങ്കേതിക കാരണം പറഞ്ഞ് എണ്ണിയില്ലെന്നും ഇവയിൽ 300ഓളം വോട്ടുകൾ തനിക്ക്​ ലഭിക്കേണ്ടതാണെന്നുമാണ് ഹരജിക്കാരന്‍റെ വാദം. 38 വോട്ടിനാണ് നജീബ് കാന്തപുരം വിജയിച്ചത്. കേസുമായി ബന്ധപ്പെട്ട നടപടിക്കിടെ തെരഞ്ഞെടുപ്പ് രേഖകൾ അടങ്ങിയ പെട്ടി കാണാതെപോയിരുന്നു. ഇത് പിന്നീട് മലപ്പുറം സഹകരണസംഘം ജോയന്‍റ്​ രജിസ്ട്രാറുടെ ഓഫിസിൽനിന്ന് കണ്ടെത്തി. ഈ സംഭവത്തിൽ കോടതി നിർദേശപ്രകാരമാണ്​ കമീഷൻ അന്വേഷണ റിപ്പോർട്ട് നൽകിയിരിക്കുന്നത്​. കോടതിയിൽ ഹാജരാക്കിയ തപാൽ ബാലറ്റ് ഉൾപ്പെടെ അടങ്ങിയ പെട്ടികൾ കോടതി നിർദേശപ്രകാരം തുറന്നു പരിശോധിച്ചിരുന്നു. ഹൈകോടതി രജിസ്ട്രാറുടെ (ജുഡീഷ്യൽ) സാന്നിധ്യത്തിൽ പരിശോധിച്ച രണ്ടാം നമ്പർ ഇരുമ്പ് പെട്ടിയിലെ പാക്കറ്റുകളെക്കുറിച്ചാണ്​ റിപ്പോർട്ട് നൽകിയിരിക്കുന്നത്.

ഇരുമ്പ്​ പെട്ടിയിലുണ്ടായിരുന്ന 567 പോസ്റ്റൽ ബാലറ്റുകളടങ്ങുന്ന പാക്കറ്റിന്‍റെ രണ്ടുവശവും കീറിയ നിലയിലായിരുന്നു. അസാധുവായ പോസ്റ്റൽ ബാലറ്റുകളിൽ രണ്ട് പാക്കറ്റുകളുടെ പുറം കവറും കീറിയിട്ടുണ്ടായിരുന്നു. ഈ പെട്ടിയിലുണ്ടായിരുന്ന ഏഴ് പാക്കറ്റും പ്ലാസ്റ്റിക് കവർകൊണ്ട് പൊതിഞ്ഞ നിലയിലായിരുന്നു. സീലും ഉണ്ടായിരുന്നില്ല. അഞ്ചാം നമ്പർ മേശയിൽ എണ്ണിയ സാധുവായ 482 വോട്ടിന്‍റെ കെട്ട് കാണാനില്ലെന്ന്​ നേരത്തേ ഹൈകോടതിയെ അറിയിച്ചിട്ടുണ്ട്​.

കലക്ടറേറ്റിൽ സ്ഥലപരിമിതി മൂലം തെരഞ്ഞെടുപ്പ് രേഖകൾ സബ് ട്രഷറികളിൽ സൂക്ഷിക്കാൻ മലപ്പുറം കലക്ടറും ജില്ല തെരഞ്ഞെടുപ്പ് ഓഫിസറുമായ ഗോപാലകൃഷ്ണൻ നിയമസഭാ മണ്ഡലങ്ങളുടെ റിട്ടേണിങ് ഓഫിസർമാർക്ക് നിർദേശം നൽകുകയായിരുന്നു. തുടർന്നാണ്​ പെരിന്തൽമണ്ണ സബ് ട്രഷറിയിൽ രേഖകൾ സൂക്ഷിച്ചത്. പ്രത്യേക സ്റ്റോർ റൂമിലോ സ്റ്റീൽ അലമാരയിലോ സൂക്ഷിക്കേണ്ടതാണെങ്കിലും അതുണ്ടായില്ല.

ജില്ല തെരഞ്ഞെടുപ്പ് ഓഫിസറുടെ നടപടിക്രമങ്ങളിലെ വീഴ്ചയാണിത്​. എന്നാൽ, പിന്നീടുള്ള സംഭവങ്ങളുമായി ഇതിന്​ ബന്ധമില്ല. കോഓപറേറ്റിവ് സൊസൈറ്റി ജോയന്‍റ്​ റജിസ്ട്രാറുടെ ഓഫിസിൽ രേഖകൾ സുരക്ഷിതമല്ലാത്ത രീതിയിൽ വെച്ചതിന്‍റെ ഉത്തരവാദിത്തം സീനിയർ ഇൻസ്പെക്ടർ സി.എൻ പ്രതീഷ്, ജോയന്‍റ്​ രജിസ്ട്രാർ എസ്.എൻ. പ്രഭിത്, ട്രഷറർ എസ്. രാജീവ്, സബ് ട്രഷറി ഓഫിസർ എൻ. സതീഷ്​ കുമാർ എന്നിവർക്കാണെന്നാണ്​ റിപ്പോർട്ടിലുള്ളത്​. ഹരജി ജൂൺ എട്ടിന്​ പരിഗണിക്കാൻ ജസ്റ്റിസ്​ എ. ബദറുദ്ദീൻ മാറ്റി.