ഇ.എൻ. സുരേഷ്​ ബാബു സി.പി.എം പാലക്കാട്​ ജില്ല സെക്രട്ടറി

പാലക്കാട്​: സംസ്ഥാന നേതൃത്വത്തിന്‍റെ ശക്തമായ ഇടപെടലിനെത്തുടർന്ന്​ സി.പി.എം പാലക്കാട്​ ജില്ല സെക്രട്ടറി സ്ഥാനത്തേക്കുള്ള മത്സരം ഒഴിവായി. സമവായ ചർച്ചയിലുണ്ടായ ധാരണപ്രകാരം ജില്ല സെക്രട്ടറിയായി ഇ.എൻ. സുരേഷ്​ ബാബുവിനെ (51) തെരഞ്ഞെടുത്തു. നിലവിൽ ജില്ല സെക്രട്ടേറിയറ്റ്​ അംഗമായ സുരേഷ്​ ബാബു ആദ്യമായാണ്​ സെക്രട്ടറിയാകുന്നത്​. 44 അംഗ ജില്ല കമ്മിറ്റിയെയും 11 അംഗ ജില്ല സെക്രട്ടേറിയറ്റിനെയും സമ്മേളനം തെരഞ്ഞെടുത്തു.

അംഗങ്ങളുടെ എണ്ണം 41ൽ നിന്ന്​ 44 ആക്കി ഉയർത്തിയ ജില്ല കമ്മിറ്റിയിൽ നിന്ന്​ 11 പേരെ ഒഴിവാക്കി. 14 പേർ പുതുമുഖങ്ങളും നാല്​ വനിതകളുമാണ്​​. സെക്രട്ടേറിയറ്റിൽ നിന്ന്​ രണ്ടുപേരെ ഒഴിവാക്കി. നാലുപേരെ പുതുതായി ഉൾപ്പെടുത്തി. ഇ.എൻ. സുരേഷ്​ ബാബു, സി.കെ. രാജേന്ദ്രൻ, പി. മമ്മിക്കുട്ടി, പി.കെ. ശശി, വി.കെ. ചന്ദ്രൻ, എസ്​. അജയകുമാർ, വി. ചെന്താമരാക്ഷൻ, എ. പ്രഭാകരൻ, ടി.എം. ശശി, കെ.എസ്​. സലീഖ, എൻ. ഉണ്ണികൃഷ്ണൻ എന്നിവരാണ്​ പുതിയ ജില്ല സെക്രട്ടേറിയറ്റ്​ അംഗങ്ങൾ.

ചിറ്റൂർ പെരുമാട്ടി കോരിയാർചള്ള ഇടയൻകൊളമ്പ്​ സ്വദേശിയായ ഇ.എൻ. സുരേഷ്​ബാബു, വിദ്യാർഥി- യുവജന പ്രസ്ഥാനത്തിലൂടെയാണ്​ പൊതുരംഗത്തേക്ക്​ വന്നത്​. എസ്​.എഫ്​.ഐ ചിറ്റൂർ ഏരിയ പ്രസിഡന്‍റ്​, ഡിവൈ.എഫ്​.ഐ ചിറ്റൂർ ​​ബ്ലോക്ക്​ സെക്രട്ടറി, സി.പി.എം പെരുമാട്ടി ലോക്കൽ സെക്രട്ടറി, ചിറ്റൂർ ഏരിയ സെക്രട്ടറി എന്നീ നിലകളിൽ പ്രവർത്തിച്ച അദ്ദേഹം,

നിലവിൽ സി.ഐ.ടി.യു ജില്ല കമ്മിറ്റിയംഗം, മലബാർ സിമന്‍റ്​സ്​ ഡയറക്ടർ, ചിറ്റൂർ താലൂക്ക്​ ടൂറിസം കോ ഓപറേറ്റിവ്​ സൊസൈറ്റി ആൻഡ്​ റിസർച്​ സെന്‍റർ പ്രസിഡന്‍റ് എന്നീ ചുമതലകൾ വഹിക്കുന്നു. നിയമബിരുദധാരിയായ സുരേഷ്​ബാബു, വ്യവസായ വകുപ്പിലെ ജോലി ഉപേക്ഷിച്ചാണ്​ സി.പി.എമ്മിൽ മുഴുവൻ സമയ പ്രവർത്തകനായത്​. ഭാര്യ: ശ്രീലേഖ. മക്കൾ: മാധവി, ആദി.