എരുമേലി പേട്ട തുള്ളൽ: ഗോളക, കൊടി, ചിലമ്പ് തുടങ്ങിയവ എടുക്കാൻ അനുവദിക്കണം; ആലങ്ങാട്​ സംഘത്തിന്‍റെ ഹരജി മാറ്റി

കൊച്ചി: എല്ലാ അവകാശങ്ങളോടെയും എരുമേലി പേട്ട തുള്ളൽ തടസ്സം കൂടാതെ നടത്താൻ അനുവദിക്കണമെന്ന്​ ആവശ്യപ്പെട്ട്​ ആലങ്ങാട് സംഘം നൽകിയ ഹരജി ഹൈകോടതി ഉത്തരവിനായി മാറ്റി. ഗോളക, കൊടി, ചിലമ്പ് തുടങ്ങിയവ എടുക്കാൻ അനുവദിക്കണമെന്നതടക്കം ആവശ്യപ്പെട്ട്​ നൽകിയ ഹരജിയാണ്​ ജസ്റ്റിസ് അമിത് റാവൽ, ജസ്റ്റിസ് പി.വി. ബാലകൃഷ്ണൻ എന്നിവരടങ്ങുന്ന ഡിവിഷൻ ബെഞ്ച്​ പരിഗണിച്ചത്​.

ആലങ്ങാട്, അമ്പലപ്പുഴ സംഘങ്ങളുടെ പരമ്പരാഗത അവകാശമാണ് എരുമേലി പേട്ടതുള്ളൽ. ​ഹൈകോടതിയും ഇത്​ ശരിവെച്ചിട്ടുണ്ട്​. ഗോളകയടക്കമുള്ളവ എടുക്കാനുള്ള അവകാശം ഹരജിക്കാരുടേതാണ്​.

ജനുവരി 11ന് ആലങ്ങാട് നിന്ന്​ തുടങ്ങി എരുമേലിയിലെത്തി 17ന് സന്നിധാനത്താണ് പേട്ട തുള്ളൽ പൂർത്തിയാകുന്നത്. ഇത് തടസ്സപ്പെടാനിടയുണ്ടെന്നാണ്​ ഹരജിക്കാരുടെ വാദം. ഇത്​ സംബന്ധിച്ച്​ ദേവസ്വം കമീഷണർക്ക്​ നിവേദനം നൽകിയെങ്കിലും നടപടിയില്ലെന്ന്​ ഹരജിയിൽ പറയുന്നു.