സംസ്ഥാനത്തെ ആദ്യ എസ്​കലേറ്റർ മേൽപാലം കോഴിക്കോട്​ പ്രവർത്തനം തുടങ്ങി

കോഴിക്കോട്​: സംസ്ഥാനത്തെ ആദ്യ എസ്​കലേറ്റർ കം എലിവേറ്റർ കം ഫൂട്​ ഒാവർ ബ്രിഡ്​ജ്​ കോഴിക്കോട്ട്​ മുഖ്യമന്ത്രി പിണറായി വിജയൻ വിഡിയോ കോൺഫറൻസിലൂടെ ഉദ്​ഘാടനം ചെയ്​തു. മൊഫ്യൂസിൽ ബസ് സ്റ്റാൻഡിന് സമീപത്തായാണ് ഒാവർ ബ്രിഡ്​ജ് നിർമിച്ചത്.

സമാനതകളില്ലാത്ത ഒട്ടേറെ പദ്ധതികൾ സമയബന്ധിതമായി പൂർത്തിയാക്കാൻ കോഴിക്കോട്​ കോർപറേഷന്​ കഴിഞ്ഞെന്ന്​ മുഖ്യമന്ത്രി പറഞ്ഞു.

കല്ലുത്താൻ കടവ് കോളനിവാസികൾക്കായി ഏഴു നിലകളുള്ള കെട്ടിടസമുച്ചയം നിർമിച്ചതും ഞെളിയൻ പറമ്പിൽ സ്വകാര്യ പങ്കാളിത്തത്തോടെ 250 കോടി രൂപ ചെലവിൽ മാലിന്യത്തിൽനിന്ന്​ വൈദ്യുതി ഉൽ​പാദിപ്പിക്കുന്ന മാലിന്യ സംസ്കരണ പദ്ധതിയുമെല്ലാം വലിയ നേട്ടമാണ്. കേന്ദ്ര സർക്കാറി​െൻറ അമൃത്​ പദ്ധതിയിലുൾപ്പെടുത്തി രാജാജി റോഡിൽ 11.35 കോടി ചെലവിലാണ്​ പാലം നിർമിച്ചതും നടപ്പാതകൾ നവീകരിച്ചതും.

മേയർ തോട്ടത്തിൽ രവീന്ദ്രൻ അധ്യക്ഷത വഹിച്ചു. കേന്ദ്ര നഗരകാര്യ മന്ത്രി ഹർദീപ്​ സിങ്​ പുരിയുടെ സന്ദേശം നഗരസഭ സെക്രട്ടറി ബിനു ഫ്രാൻസിസ്​ ചടങ്ങിൽ വായിച്ചു.