മുംബൈയിൽ കുടുങ്ങിയ വിദ്യാർഥികളെ വീട്ടിലെത്തിക്കാൻ മുൻ എം.പിയുടെ സഹായഹസ്തം

കാസർകോട്​: ലോക്ഡൗണിനെ തുടർന്ന് മുംബൈയിലെ പഠനസ്ഥലത്ത് കുടുങ്ങിയ മലയാളി വിദ്യാർഥികളെ വീട്ടിലെത്തിക്കാൻ മുൻ എം.പി പി. കരുണാകര​​െൻറ സഹായഹസ്തം. പാലക്കാട് അട്ടപ്പാടി സ്വദേശികളടക്കമുള്ള സംസ്ഥാനത്തെ വിവിധ ജില്ലകളിലെ 20 പട്ടികജാതി -പട്ടികവർഗ പിന്നാക്ക വിഭാഗത്തിലുള്ള വിദ്യാർഥികളാണ് മുംബൈയിലെ പഠനസ്ഥലത്ത് കുടുങ്ങിയിരുന്നത്. വിവിധ മലയാളി സമാജം പ്രവർത്തകരുടെ ഇടപെടലിനെ തുടർന്ന്​ ഈ വിദ്യാർഥികൾക്ക് വീട്ടിലേക്ക് പോകാൻ വഴിതുറക്കുകയായിരുന്നു. 

ചൊവ്വാഴ്ച അർധരാത്രി തലപ്പാടി ചെക്പോസ്​റ്റിലെത്തിയ വിദ്യാർഥികളെ യുവജനക്ഷേമ ബോർഡ് ജില്ല യുവജന കേന്ദ്രത്തി​​െൻറ നേതൃത്വത്തിൽ വീടുകളിലെത്തിക്കും. ഇതിനായി വാഹനം ഏർപ്പാടാക്കാനായാണ് മുൻ എം.പി പി. കരുണാകരൻ അര ലക്ഷം രൂപ നൽകിയത്.യുവജനക്ഷേമ ബോർഡ് ജില്ല കോഒാഡിനേറ്റർ എ.വി. ശിവപ്രസാദ് പി. കരുണാകരനിൽനിന്ന് തുക ഏറ്റുവാങ്ങി.