രക്തസാക്ഷി പട്ടിക: മലബാർ കലാപകാരികളെ ഒഴിവാക്കിയത്​ പ്രതിഷേധാർഹം -കോടി​യേരി

തിരുവനന്തപുരം: സ്വാതന്ത്ര്യ സമര രക്തസാക്ഷി പട്ടികയിൽനിന്ന് മലബാർ കാർഷിക കലാപകാരികളെ ഒഴിവാക്കാനുള്ള ശിപാർശക്ക്​ അംഗീകാരം നൽകിയ ഇന്ത്യൻ ചരിത്ര ഗവേഷണ കൗൺസിൽ തീരുമാനം അങ്ങേയറ്റം പ്രതിഷേധാർഹമെന്ന്​ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണൻ.

സ്വാതന്ത്യ സമര ചരിത്രത്തിൽ സവിശേഷ സ്ഥാനമുള്ള പ്രക്ഷോഭമാണ് മലബാർ കലാപം. ജന്മിത്വത്തിനും അതിനെ താങ്ങിനിർത്തിയ സാമ്രാജ്യത്വത്തിനുമെതിരായുള്ള ധീരോജ്ജ്വല സമരമായിരുന്നു അത്​. മതരാഷ്ട്ര ചിന്തകൾക്കതീതമായി സാമ്രാജ്യത്വത്തിനും ജന്മിത്വത്തിനുമെതിരായ പോരാട്ടമാണ് തങ്ങൾ മുന്നോട്ട് വെക്കുന്നതെന്ന് അതിന്‍റെ നേതാക്കൾ വ്യക്തമാക്കിയിരുന്നു. ഇതിൽ നിന്ന്​ വ്യതിചലിക്കുന്നവർക്കെതിരെ കർശന നിലപാടും വാരിയംകുന്നത്ത് കുഞ്ഞഹമ്മദ് ഹാജിയെ പോലുള്ള നേതാക്കൾ നടത്തി.

ഈ സ്വാതന്ത്ര്യ പ്രസ്ഥാനത്തെ മാപ്പിള ലഹളയെന്നു പറഞ്ഞ് ഒറ്റപ്പെടുത്താനാണ് ബ്രിട്ടീഷ് സാമ്രാജ്യത്വം ശ്രമിച്ചത്. ഈ പാത പിന്തുടർന്ന് മലബാർ കാർഷിക കലാപകാരികളെ വർഗീയമായി മുദ്രകുത്താനുള്ള സംഘ്​പരിവാർ അജണ്ടയാണ് കൗൺസിൽ തീരുമാനത്തിലൂടെ വ്യക്തമാകുന്നത്. മലബാർ കലാപകാരികളെ രാജ്യ​ദ്രോഹക്കുറ്റം ചുമത്തിയാണ് ബ്രിട്ടീഷുകാർ വെടിവച്ചുകൊന്നത്. അതെ കാഴ്ചപ്പാടാണ് സംഘ്​പരിവാർ സ്വീകരിക്കുന്നത്.

ചരിത്രത്തെ വർഗീയവത്​കരിക്കുകയും വിഷലിപ്തമാക്കുകയും ചെയ്യുന്ന ആർ.എസ്​.എസ്​ അജണ്ടയാണ് ഇതിലൂടെ പുറത്തുവരുന്നത്. സ്വാതന്ത്ര്യ സമരത്തെ ഒറ്റുകൊടുത്ത് ബ്രിട്ടീഷുകാർക്കൊപ്പം നിന്ന ആർ.എസ്​.എസ്​ അവരുടെ ചരിത്രപാതകൾ നമ്മുടെ ചിന്തയിൽ തിരുകിക്കയറ്റാനാണ് ശ്രമിക്കുന്നതെന്നും അദ്ദേഹം പറഞ്ഞു.