വ്യായാമമാകാം; സ്​ത്രീകൾ ഇടകലരരുത്​ -സമസ്ത കാന്തപുരം വിഭാഗം

കോഴിക്കോട്​: വ്യായാമത്തിന്‍റെ പേരിൽ അന്യ പുരുഷന്മാരുടെ മുന്നിലും ഇടകലർന്നും സ്ത്രീകൾ അഭ്യാസം നടത്തുന്നതും മതവിശ്വാസത്തിന്​ ഹാനികരമാകുന്ന ഗാനങ്ങളും പ്രചാരണങ്ങളും ക്ലാസുകളും സംഘടിപ്പിച്ച്​ അതിലേക്ക്​ ജനങ്ങളെ ക്ഷണിക്കുന്നതും അനുവദനീയമല്ലെന്ന്​ സമസ്ത കാന്തപുരം വിഭാഗം മുശാവറ.

സുന്നി വിശ്വാസികൾ ഇത്തരം കാര്യങ്ങളിൽ ജാഗ്രത പുലർത്തി പൂർവിക വിശ്വാസ ആചാരങ്ങളും നയങ്ങളും മുറുകെപ്പിടിച്ച്​ ജീവിക്കണമെന്നും മുശാവറ യോഗം അഭ്യർഥിച്ചു. ആരോഗ്യ സംരക്ഷണം ഇസ്​ലാം പ്രാധാന്യം നൽകുന്നുണ്ട്​. ജീവിത ശൈലി രോഗങ്ങൾ തടയുന്നതിനും ശരീരിക ഉണർവിനും മത നിയമങ്ങൾക്ക്​ വിധേയമായ ആവശ്യമായ വ്യായാമം വിരോധിക്കപ്പെട്ട​തല്ലെന്നും മുശാവറ വ്യക്തമാക്കി.

മെക്​ 7 വിവാദ പശ്ചാത്തലത്തിലാണ്​ ഇതുസംബന്ധിച്ച വിശദീകരണമെന്ന്​ ചൂണ്ടിക്കാണിക്കപ്പെടുന്നു.സമസ്ത സെന്‍റിനറിയുടെ ഭാഗമായി ഫെബ്രുവരി 11ന്​ കോഴിക്കോട്​ മുൽതഖർ ഉലമായും ഏപ്രിലിൽ ജില്ല, മേഖല തലങ്ങളിൽ പണ്ഡിത സംഗമങ്ങളും സംഘടിപ്പിക്കാനും തീരുമാനിച്ചു. പ്രസിഡന്‍റ്​ ഇ. സുലൈമാൻ മുസ്​ലിയാർ അധ്യക്ഷത വഹിച്ചു. ജന. സെക്രട്ടറി കാന്തപുരം അബൂബക്കർ മുസ്​ലിയാർ ഉദ്​ഘാടനം ചെയ്തു.