പ്രവാസി ഇൻഷുറൻസ്​: സാധ്യത പരിശോധിക്കും -മുഖ്യമന്ത്രി

തിരുവനന്തപുരം: പ്രവാസികളുടെയും കുടുംബത്തി​‍െൻറയും ചികിത്സ, കുട്ടികളുടെ വിദ്യാഭ്യാസം എന്നിവ ഉൾപ്പെടുത്തി പ്രവാസികൾക്കായി ഇൻഷുറൻസ്​ ഏർപ്പെടുത്തുന്ന കാര്യം​ പരിശോധിക്കുമെന്ന്​ മുഖ്യമന്ത്രി പിണറായി വിജയൻ. ഇതുസംബന്ധിച്ച്​ ഈ രംഗത്തെ വിദഗ്​ധ​രുമായി ആലോചിക്കും. മൂന്നാംലോക കേരളസഭയുടെ സമാപന സെഷനിൽ സംസാരിക്കുകയായിരുന്നു അദ്ദേഹം.

പ്രവാസികളുടെ കൃത്യമായ ഡാറ്റ ലഭ്യമല്ലാത്തത്​ പ്രവാസി ക്ഷേമ പ്രവർത്തനങ്ങളെ തടസ്സപ്പെടുത്തുന്നുണ്ട്​. കേന്ദ്ര സർക്കാറി​‍െൻറ പക്കലും കൃത്യമായ ഡാറ്റയില്ല. ഈ സാഹചര്യത്തിൽ 2022-23 വർഷം കേരള മൈഗ്രഷൻ സർവേ നടത്തി ഡാറ്റ ബാങ്ക്​ വിപുലീകരിക്കുകയും സമഗ്രമാക്കുകയും ചെയ്യും. ഇതിനായി ​ മലയാള പ്രവാസി ഡാറ്റ പോർട്ടൽ വികസിപ്പിക്കുകയും പ്രവാസികളുടെ ഇൻഷുറൻസ്​, അനുബന്ധ ക്ഷേമപദ്ധതികൾ എന്നിവ ഇതുമായി ബന്ധിപ്പിക്കുകയും ചെയ്യും. പ്രവാസികളെ ഡാറ്റ ബാങ്കി‍െൻറ ഭാഗമാക്കുന്നതിന്​ ആഗോള രജിസ്​ട്രേഷൻ കാമ്പയിൻ ആരംഭിക്കുമെന്നും മുഖ്യമന്ത്രി വ്യക്തമാക്കി.

ലോക കേരളസഭയിൽ ഉയർന്ന നിർദേശങ്ങൾ സർക്കാർ ഗൗരവമായി പരിഗണിക്കുകയും സഭ സെക്രട്ടേറിയറ്റ്​ ആവശ്യമായ തീരുമാനങ്ങൾ കൈക്കൊള്ളുകയും ചെയ്യും. ഇവയിൽ കേന്ദ്രവുമായി ആലോചിച്ച്​ ചെയ്യേണ്ടവ അങ്ങനെയും സംസ്ഥാനത്തിന്​ സ്വന്തമായി ചെയ്യാവുന്നവ ആ നിലക്കും മുന്നോട്ടുകൊണ്ടുപോകും. പ്രവാസി സമൂഹത്തെക്കുറിച്ചും അവരുടെ മടങ്ങിവരവ്​, ​തുടർന്നുള്ള ജീവിതം, സുരക്ഷിതത്വം എന്നിവ സംബന്ധിച്ചും സർക്കാറിന്​ കരുതലും ശ്രദ്ധയുമുണ്ട്​. പ്രവാസി സമൂഹത്തിനും കേരള സമൂഹത്തിനുമിടയിൽ ഇനി കടലുകളു​ടെ വിടവുണ്ടാവുകയില്ല.

പ്രവാസികൾക്ക്​ നിയമസഹായം നൽകുന്നതിന്​ അതത്​ രാജ്യങ്ങളിലെ നിയമജ്ഞരെക്കൂടി ഉൾപ്പെടുത്തി നിയമസഹായ സംവിധാനം ഏർപ്പെടുത്തുന്നതിനുള്ള സാധ്യത പരിശോധിക്കും. പ്രവാസി കലാകാരൻമാർക്ക്​ ഇവിടെ വേദിയൊരുക്കുന്നതിനെകുറിച്ച്​​ സർക്കാർ ആലോചിക്കുന്നുണ്ട്. പ്രവാസി കലോത്സവ സാധ്യത, സാഹിത്യാഭിരുചിയുള്ള പ്രവാസികളുടെ രചനകൾ പ്രസിദ്ധീകരിക്കൽ എന്നിവയും പരിഗണിക്കും. ​പ്രവാസി കൂട്ടായ്മക്ക്​ ഉന്നത നിലവാരമുള്ള വിദ്യാഭ്യാസ സ്ഥാപനം സ്ഥാപിക്കാൻ കഴിയും. ഇക്കാര്യത്തിൽ സർക്കാറി‍െൻറ ഭാഗത്തുനിന്ന്​ ആവശ്യമായ സഹായം നൽകുമെന്നും അദ്ദേഹം പറഞ്ഞു.