വിവാഹ വാഗ്‌ദാനം നൽകി പണംതട്ടിയ ശേഷം കാൻസറാണെന്ന് പറഞ്ഞ് പിന്മാറാൻ ശ്രമിച്ചു​; വ്യാജ ഐ.പി.എസുകാരൻ പിടിയിൽ

കളമശ്ശേരി: നിരവധി പേർക്ക് വിവാഹവാഗ്ദാനം നൽകി പണംതട്ടിയതടക്കം ഐ.പി.എസ് ഉദ്യോഗസ്ഥനെന്ന വ്യാജേന തട്ടിപ്പ്​ നടത്തിവന്ന യുവാവ് പിടിയിൽ. ഒട്ടേറെ ക്രിമിനൽ കേസുകളിലെ പ്രതിയായ മലപ്പുറം ചേലേമ്പ്ര കാക്കഞ്ചേരി റോഡ്​ സ്കൈ വ്യൂവിൽ കാർത്തിക് വേണുഗോപാലിനെയാണ്​ (വിപിൻ കാർത്തിക് -31) കളമശ്ശേരി പൊലീസ് അറസ്റ്റ് ചെയ്തത്.

ബംഗളൂരുവിൽ മലയാളി യുവതിയെ വിവാഹ വാഗ്‌ദാനം നൽകി പണവും വാഹനങ്ങളും കൈവശപ്പെടുത്തിയശേഷം തനിക്ക്​ കാൻസറാണെന്ന് പറഞ്ഞ് യുവതിയെ വിശ്വസിപ്പിച്ചു. വിവാഹത്തിൽനിന്ന്​ പിന്മാറാൻ ശ്രമിച്ച കാരണത്തിന് ബംഗളൂരു സിറ്റി പൊലീസ് പരിധിയിലുള്ള കടുകോടി പൊലീസ് സ്റ്റേഷനിൽ രജിസ്റ്റർ ചെയ്ത കേസിലാണ് ഇയാളെ നിലവിൽ പിടികൂടിയത്.

നിരവധി പെൺകുട്ടികളുമായി സൗഹൃദം സ്ഥാപിച്ചിട്ടുള്ള ഇയാൾ, വിവാഹ വാഗ്ദാനം നൽകി അവരിൽനിന്ന്​ പണം കൈക്കലാക്കിയശേഷം വഞ്ചിക്കുകയായിരുന്നു. നിരവധി പേരിൽനിന്ന്​ വ്യാജരേഖ ചമച്ച്​ വായ്പ തട്ടിയതിനും വ്യാജ ശമ്പള സർട്ടിഫിക്കറ്റ് ഉണ്ടാക്കി ബാങ്കുകളിൽനിന്നും വായ്പയെടുത്ത്​ തട്ടിപ്പു നടത്തിയതിനും ഇയാൾക്കെതിരെ കേസ്​ ഉള്ളതായി പൊലീസ് പറഞ്ഞു.

ബംഗളൂരു സിറ്റി പൊലീസ് കമീഷണറുടെ ആവശ്യപ്രകാരം കൊച്ചി സിറ്റി പൊലീസ് കമീഷണറുടെ മേൽനോട്ടത്തിൽ ഡി.സി.പി അശ്വതി ജിജി, തൃക്കാക്കര എ.സി.പി ബേബി എന്നിവരുടെ നേതൃത്വത്തില്‍ ഇടപ്പള്ളി ലുലു മാളിൽ ​െവച്ച് സാഹസികമായി പിടികൂടുകയായിരുന്നു. ഇയാളിൽനിന്ന്​ ഫോണും ലാപ്ടോപ്പും പണവും പിടിച്ചെടുത്തു.

പുതുനഗരം, ചിറ്റൂർ, ഗുരുവായൂർ (അഞ്ച്​), നാദാപുരം (രണ്ട്​), വടകര, തലശ്ശേരി, കന്‍റോൺമെന്‍റ്​ സ്‌റ്റേഷൻ (മൂന്ന്​), എറണാകുളം സെൻട്രൽ, ജീവൻഭീമ നഗർ ബംഗളുരു, കിളികൊല്ലൂർ, തൃക്കാക്കര, വിൽസൺ ഗാർഡൻ ബംഗളൂരു, പാലാരിവട്ടം സ്റ്റേഷനുകളിൽ ഇയാൾക്കെതിരെ കേസുകൾ നിലവിലുണ്ട്. പ്രതിയെ ബംഗളൂരു പൊലീസിന് കൈമാറി.