ഓട്ടോയിൽ കാട്ടിറച്ചി വെച്ച് യുവാവിനെതിരെ കള്ളക്കേസ്​: 13 വനം ഉദ്യോഗസ്ഥർക്കെതിരെ കേസെടുത്തു​

തൊടുപുഴ: ഓട്ടോയിൽ കാട്ടിറച്ചി കടത്തിയെന്ന്​ ആരോപിച്ച്​ ആദിവാസി യുവാവിനെ കള്ളക്കേസിൽ കുടുക്കിയ സംഭവത്തിൽ മുൻ വൈൽഡ്​ ലൈഫ്​ വാർഡൻ ഉൾപ്പെടെ 13 വനം വകുപ്പ് ഉദ്യോഗസ്ഥർക്കെതിരെ പൊലീസ് കേസെടുത്തു. ഇടുക്കി ഉപ്പുതറ കണ്ണംപടിമുല്ല പുത്തൻപുരക്കൽ സരുൺ സജിയെ (24) കള്ളക്കേസെടുത്ത്​ മർദിച്ച കേസിൽ പട്ടികജാതി, പട്ടികവർഗ കമീഷന്‍റെ ഉത്തരവ്​ പ്രകാരമാണ്​ ഉപ്പുതറ പൊലീസിന്‍റെ നടപടി.

ഇടുക്കി മുൻ വൈൽഡ് ലൈഫ് വാർഡൻ രാഹുൽ, കിഴുകാനം ഫോറസ്റ്റ്​ ഓഫിസർ അനിൽകുമാർ, ബീറ്റ്​ ഫോറസ്റ്റ്​ ഓഫിസർമാരായ ലെനിൻ, ജിമ്മി, ഷിജിരാജ്​, ഷിബിൻ ദാസ്​, മഹേഷ്​, ഫോറസ്റ്റ്​ വാച്ചർമാരായ മോഹനൻ, ജയകുമാർ, സന്തോഷ്​, ഗോപാലകൃഷ്ണൻ, ഭാസ്കരൻ, ലീലാമണി എന്നിവർക്കെതിരെയാണ്​ പട്ടികജാതി പീഡന നിരോധന നിയമപ്രകാരം ജാമ്യമില്ല വകുപ്പുകൾ ചുമത്തി കേസ്​ എടുത്തത്​.​ ദേഹോപദ്രവം ഏൽപിക്കൽ, തെളിവ്​ നശിപ്പിക്കൽ, അസഭ്യം പറയൽ തുടങ്ങിയ കുറ്റങ്ങളും ചുമത്തിയിട്ടുണ്ട്​.

സെപ്റ്റംബർ 20നാണ് കേസിനാസ്പദമായ സംഭവം. കാട്ടിറച്ചി കടത്തിയെന്നാരോപിച്ച് സരുൺ സജിയെ അറസ്റ്റ്​ ചെയ്യുകയും മർദിക്കുകയുമായിരുന്നു. എന്നാൽ, ഇറച്ചി വനം ഉദ്യോഗസ്ഥർ സരുണിനെ കുടുക്കാൻ ഓട്ടോയിൽ കൊണ്ടുവെച്ചതാണെന്നും മഹസർ കെട്ടിച്ചമച്ചതാണെന്നും വനംവകുപ്പ്​ ഉന്നത ഉദ്യോഗസ്ഥർ നടത്തിയ അന്വേഷണത്തിൽ കണ്ടെത്തി. തുടർന്ന്​, വൈൽഡ്​ലൈഫ്​ വാർഡനടക്കം കുറ്റക്കാരായ ഏഴ്​ ഉദ്യോഗസ്ഥരെ സസ്​പെൻഡ്​​ ചെയ്തു.

അതേസമയം, സരുണിനെതിരായ കേസ്​ ഇനിയും പിൻവലിച്ചിട്ടില്ല. ഇതിനിടെയാണ്​ ഉദ്യോഗസ്ഥർക്കെതിരെ കേസ്​ എടുക്കണമെന്നാവശ്യപ്പെട്ട്​ സരുൺ പട്ടികജാതി, പട്ടികവർഗ കമീഷനെ സമീപിച്ചത്​. ഇവർക്കെതിരെ രണ്ടാഴ്ചക്കകം കേസെടുത്ത്​ റിപ്പോർട്ട്​ നൽകണമെന്നായിരുന്നു ഉപ്പുതറ പൊലീസിന്​ കമീഷൻ നൽകിയ നിർദേശം.