മാമി തിരോധാനം: അന്വേഷണം സത്യസന്ധമാകണം, എത്രയും വേഗം തുമ്പുണ്ടാക്കണമെന്നും കുടുംബം

കോഴിക്കോട്​: മുഹമ്മദ്​ ആട്ടൂരിന്‍റെ (മാമി) തിരോധാനം സംബന്ധിച്ച അന്വേഷണം സത്യസന്ധമായി നടത്തണമെന്നും കേസിൽ എത്രയും വേഗം തുമ്പുണ്ടാക്കണമെന്നും ഭാര്യ റംലത്ത് പുളിയക്കുത്ത്. മലപ്പുറം എസ്​.പി ശശിധരന്‍റെ നേതൃത്വത്തിൽ എ.ഡി.ജി.പി എം.ആർ. അജിത്​കുമാർ നി​യോഗിച്ച അന്വേഷണ സംഘത്തെ സംബന്ധിച്ച്​ വിവാദമുയർന്ന സാഹചര്യത്തിലാണ്​ റംലയുടെ പ്രതികരണം.

എ.ഡി.ജി.പിയും മലപ്പുറം എസ്​.പിയും തമ്മിലെ വിഷയങ്ങൾ എന്തായാലും തന്നെ സംബന്ധിച്ച്​ ഒരുവർഷം പൂർത്തിയായ ഭർത്താവിന്‍റെ തിരോധാനമാണ്​ പ്രശ്നം. 99 ശതമാനവും മാമിക്ക്​ അപായം സംഭവിച്ചിരിക്കാമെന്നാണ്​ പൊലീസ്​ തന്നോട്​ പറഞ്ഞത്​. പക്ഷേ, താൻ ബാക്കിയുള്ള ഒരു ശതമാനത്തിൽ പ്രതീക്ഷയർപ്പിച്ചിരിക്കുകയാണ്​. മാമി പൂർണ ആരോഗ്യവാനായിരുന്നതിനാൽ മറ്റു നിലയിലുള്ള മരണം സംബന്ധിച്ച്​ സംശയവുമില്ല.

മാമിയെ ആര്​ കൊണ്ടുപോയി, എന്തിന്​ കൊണ്ടുപോയി, എങ്ങനെ കൊണ്ടുപോയി തുടങ്ങിയ ചോദ്യങ്ങൾക്ക്​ പൊലീസ്​ ഉത്തരം നൽകണം. മറ്റൊരു അന്വേഷണ സംഘത്തെ ​നിയോഗിച്ച്​ വീണ്ടും അന്വേഷണം പ്രാരംഭ ദിശയിൽനിന്ന്​ തുടുങ്ങുന്നതിന്​ പകരം നിലവിലെ അന്വേഷണത്തിൽ കണ്ടെത്തിയ വിവരങ്ങൾ വെച്ചുകൊണ്ട്​ കേസിന്​ തുമ്പുണ്ടാക്കുകയാണ്​ വേണ്ടതെന്നും റംലത്ത്​ ‘മാധ്യമ’ത്തോട്​ പറഞ്ഞു.