ഫാഷൻ ഗോൾഡ്​: വകുപ്പിനെ മറികടന്ന്​ ക്രൈംബ്രാഞ്ച്​ നീക്കം

കാസർകോട്​: ഫാഷൻ ഗോൾഡ്​ നിക്ഷേപ തട്ടിപ്പിൽ മുഖ്യപ്രതി പൂക്കോയ തങ്ങളുടെ അറസ്​റ്റിന്​ വഴിവെച്ചത്​ ആഭ്യന്തര വകുപ്പി​െൻറ 'താൽപര്യം' മറികടന്നുള്ള ക്രൈംബ്രാഞ്ച്​ നീക്കം. ഫാഷൻ ഗോൾഡി​െൻറ ചെയർമാനായിരുന്ന മഞ്ചേശ്വരം മുൻ എം.എൽ.എ എം.സി. ഖമറുദ്ദീ​െൻറ അറസ്​റ്റോടെ സർക്കാറിനും സി.പി.എമ്മിനും കേസ്​ മതിയായി. തിരുവനന്തപുരം വിമാനത്താവളം വഴിയുള്ള സ്വർണക്കടത്ത്​ മുഖ്യമന്ത്രിയെയും ക്ലിഫ്​ ഹൗസിനെയും പ്രതിക്കൂട്ടിലാക്കിയതോടെ പ്രതിപക്ഷം ആരംഭിച്ച പ്രക്ഷോഭത്തെ നേരിടാനാണ്​ പൊളിഞ്ഞ ജ്വല്ലറി കൂട്ടുകച്ചവടത്തെ വലിയ കുംഭകോണമായി സർക്കാർ വളർത്തിയെടുത്തതെന്ന ആക്ഷേപം അന്നേയുണ്ടായിരുന്നു.

ഫാഷൻ ഗോൾഡ്​ ചെയർമാൻ എം.സി. ഖമറുദ്ദീനെ മൊഴിയെടുക്കാനെന്നപേരിൽ വിളിച്ചുവരുത്തി അന്നുതന്നെ അറസ്​റ്റും രേഖപ്പെടുത്തി അദ്ദേഹത്തെ ജയിലിലേക്കയച്ചു. അതോടെ അന്വേഷണം നിലച്ചമട്ടായി. നാലു ജില്ലകളിലായി അഞ്ച്​ സംഘങ്ങളുണ്ടാക്കി വൻ സന്നാഹങ്ങളോടെ നടത്തിയ അന്വേഷണം അവസാനിപ്പിച്ചു. അതുവരെ പ്രക്ഷോഭങ്ങൾ നടത്തിയ സി.പി.എമ്മും മിണ്ടാതായി. പൂക്കോയ തങ്ങളെ അറസ്​റ്റു ചെയ്യുന്നതിന്​ സി.പി.എമ്മും അനുകൂലമായിരുന്നില്ല. കേസന്വേഷണത്തിനു മേൽനോട്ടം വഹിച്ച വിവേക്​ കുമാർ ഐ.പി.എസിനെ തൃശൂരിലേക്ക്​ തെരഞ്ഞെടുപ്പ്​ ചട്ടമനുസരിച്ച്​ സ്​ഥലം മാറ്റി. എന്നാൽ, ചുമതല ആർക്കും കൈമാറിയില്ല. എല്ലാ അന്വേഷണ ഉദ്യോഗസ്​ഥരും പല ലാവണങ്ങളിലായി. പുതിയ ജോലികൾ ഏറ്റെടുത്തു. ആഭ്യന്തര വകുപ്പിൽ നിന്നോ ക്രൈംബ്രാഞ്ച്​ തലപ്പത്തുനിന്നോ നിർദേശങ്ങൾ കാര്യമായി വന്നില്ല. ക്രൈംബ്രാഞ്ചി​െൻറ സമകാലിക അന്വേഷണ ചരിത്രത്തിലെ ഏറ്റവും വലിയ നാണക്കേടായി ഫാഷൻ ഗോൾഡ്​ കേസ്​ മാറി.

എന്നാൽ, ക്രൈംബ്രാഞ്ച്​ കണ്ണൂർ മേഖല എസ്​.പിയായി മൊയ്​തീൻ കുട്ടി ചുമതലയേറ്റതോടെ കേസ്​ പുനരാരംഭിച്ചു. ​മൊയ്​തീൻ കുട്ടിയു​െട നേതൃത്വത്തിൽ ഡിവൈ.എസ്​.പി എം. സുനിൽ കുമാറി​െൻറ ചുമതലയിൽ അന്വേഷണ ഉദ്യോഗസ്​ഥനായി ടി. മധുസൂദനനെ നിയമിച്ചു. പ്രതിയുടെ ബന്ധുക്കളുടെ 15ഓളം വീടുകളിൽ പലതവണ സന്ദർശിച്ചതോടെ നേപ്പാളിലുണ്ടായ പ്രതിക്ക്​ നാട്ടിലേക്ക്​ മടങ്ങേണ്ടിവന്നു. അന്വേഷണം ശക്​തമാക്കിയതി​െൻറ ഭാഗമായി വീടുകൾ കേന്ദ്രീകരിച്ച്​ നടത്തിയ അന്വേഷണം ഭരണപക്ഷത്തിനു കീറാമുട്ടിയായി. വീടുകൾ കയറിയുള്ള അന്വേഷണം പാടില്ലെന്നും സമ്മർദമുണ്ടായി. ക്രൈംബ്രാഞ്ചി​െൻറ മാനം രക്ഷിക്കാനുള്ള അന്വേഷണം ശക്​തമാക്കിയതോടെ പ്രതി കീഴടങ്ങുകയായിരുന്നു.