ഫുഡ് സ്ട്രീറ്റ് പരിപാടി: ഡി.വൈ.എഫ്.ഐയെ ട്രോളി ഫാത്തിമ തെഹ് ലിയ

കോഴിക്കോട്: ഡി.വൈ.എഫ്.ഐയെക്കെതിരെ പരിഹാസവുമായി എം.എസ്.എഫ് നേതാവ് ഫാത്തിമ തെഹ് ലിയ. ഡിവൈഎഫ്‌ഐയുടെ ഫുഡ് സ്ട്രീറ്റ് പ്രതിഷേധത്തിന് അഭിവാദ്യങ്ങള്‍ നേര്‍ന്ന ബി.ജെ.പി നേതാവ് ശങ്കു ടി. ദാസിന്‍റെ പോസ്റ്റുകൂടി പങ്കുവെച്ചാണ് ഡി.വൈ.എഫ്.ഐയെ ഫാത്തിമ പരിഹസിച്ചത്.

'ഡി.വൈ.എഫ്.ഐ മിത്രങ്ങള്‍ക്ക് സംഘ് മിത്രങ്ങളുടെ അഭിനന്ദന പ്രവാഹം' എന്ന് ഫാത്തിമ കുറിച്ചു.

ഹലാല്‍ ഫുഡ് സ്ട്രീറ്റ് സംഘടിപ്പിച്ച ഡി.വൈ.എഫ്.ഐയുടെ നടപടി ധീരമാണ്, മാതൃകാപരമാണ്, സ്വാഗതാര്‍ഹവുമാണ് എന്നാണ് ബി.ജെ.പി നേതാവായ ശങ്കു ടി. ദാസ് ഫേസ്ബുക് പോസ്റ്റിൽ പറയുന്നത്.

''നല്ലത് ആര് ചെയ്താലും അംഗീകരിക്കണം എന്നാണ്. ഭക്ഷണത്തില്‍ മതം കലര്‍ത്തുന്ന ഹലാല്‍ വര്‍ഗ്ഗീയതക്ക് എതിരെ പോര്‍ക്ക് വിഭവങ്ങള്‍ ഉള്‍പ്പെടുത്തി നോണ്‍ ഹലാല്‍ ഫുഡ് സ്ട്രീറ്റ് സംഘടിപ്പിച്ച ഡി.വൈ.എഫ്.ഐയുടെ നടപടി ധീരമാണ്, മാതൃകാപരമാണ്, സ്വാഗതാര്‍ഹവുമാണ്. ബജരംഗ് ദളോ ഹനുമാന്‍ സേനയോ എങ്കിലും ചെയ്യണമെന്ന് ഞാനുള്‍പ്പെടെ പലരും ആഗ്രഹിച്ച കാര്യമാണ് ഇന്ന് ഡി.വൈ.എഫ്.ഐ ചെയ്തിരിക്കുന്നത്. അഭിവാദ്യങ്ങള്‍'' ശങ്കു ടി. ദാസ് അഭിനന്ദന കുറിപ്പില്‍ പറയുന്നു.

ഭക്ഷണത്തില്‍ മതം കലര്‍ത്തിയുള്ള സംഘപരിവാര്‍ സംഘടനകളുടെ വിദ്വേഷ പ്രചാരണത്തിനെതിരെയാണ് ഡി.വൈ.എഫ്.ഐയുടെ നേതൃത്വത്തില്‍ 'ഫുഡ് സ്ട്രീറ്റ് ' സംഘടിപ്പിച്ചത്.