ഷൈനിന് തെറ്റ് തിരുത്താൻ ഒരു അവസരം കൂടി നൽകുമെന്ന് ഫെഫ്ക; മയക്കുമരുന്ന് ശീലത്തിൽ നിന്ന് പുറത്തുകടക്കാൻ പ്രഫഷനൽ സഹായം നൽകും

കൊച്ചി: മയക്കുമരുന്ന്​ ഉപ​യോഗിക്കുന്നതായി ഷൈൻ സമ്മതിച്ചിട്ടു​ണ്ടെന്നും തെറ്റ്​ തിരുത്താൻ അദ്ദേഹത്തിന്​ ഒരു അവസരം കൂടി നൽകുകയാണെന്നും ​ഫെഫ്ക ജനറൽ സെക്രട്ടറി ബി. ഉണ്ണികൃഷ്ണൻ. ഇത്തരം ശീലത്തിൽനിന്ന്​ പുറത്തുകടക്കാൻ ഷൈനിന്​ പ്രഫഷനൽ സഹായം ആവശ്യമാണെന്നും തെറ്റുതിരുത്താൻ നൽകുന്ന അവസാന അവസരമാണ്​ ഇതെന്നും ഉണ്ണികൃഷ്ണൻ വാർത്തസമ്മേളനത്തിൽ പറഞ്ഞു.

ഇത്തരം പെരുമാറ്റ രീതികൾ വെച്ചുപുലർത്തുന്നവരുമായി സഹകരിക്കാൻ ഫെഫ്കക്ക്​ ബുദ്ധിമുട്ടുണ്ട്​. മയക്കുമരുന്ന്​ വലിയ ഭീഷണിയായി വളരുന്ന സാഹചര്യത്തിൽ സിനിമാമേഖലയെ ചുറ്റിപ്പറ്റി നിരവധി ആരോപണങ്ങൾ ഉയരുന്നുണ്ട്​. എന്നാൽ, തങ്ങൾ ജോലി ചെയ്യുന്ന മേഖല ലഹരിമുക്തമാണെന്ന്​ പൊതുസമൂഹത്തെ ബോധ്യപ്പെടുത്തേണ്ട ബാധ്യത ഫെഫ്കക്കുണ്ട്​. ഇതിന്‍റെ ഭാഗമായി ലഹരിവിരുദ്ധ സമിതികൾ എല്ലാ ഷൂട്ടിങ്​ ലൊക്കേഷനുകളിലും വിജയകരമായി പ്രവർത്തിക്കുന്നുണ്ട്​.

വിൻസി ഫെഫ്കയുമായി ബന്ധപ്പെട്ടിരുന്നു. ആരോപണ വിധേയനായ നടന്‍റെയും സിനിമയുടെയും പേര്​ വെളിപ്പെടുത്തരുതെന്നാണ്​ അവർ പറഞ്ഞത്​. സിനിമയുടെ ആഭ്യന്തര സമിതിക്ക്​ (ഐ.സി) പരാതി നൽകാനാണ്​ വിൻസിയോട്​ നിദേശിച്ചത്​. തൊഴിലിടം ലഹരിമുക്തമാക്കാനുള്ള പ്രവർത്തനങ്ങൾക്കിടെ അഭിനേതാക്കൾ ഈ രീതിയിൽ പെരുമാറിയാൽ പൊരുത്തപ്പെട്ട്​​ പോകാൻ ബുദ്ധിമുട്ടാണെന്ന്​ താരസംഘടനയായ ’അമ്മ’യെ ഫെഫ്ക അറിയിച്ചിട്ടുണ്ട്​. ഫെഫ്​കയിലെ അംഗങ്ങൾക്കും ഇത്​ ബാധകമാണ്​. നിർമാതാക്കൾ മുതൽ മുടക്കാൻ തയാറല്ലാത്തതിനാൽ മലയാളത്തിൽ കഴിഞ്ഞ ആറു​ മാസത്തിനിടെ സിനിമ നിർമാണം 45 ശതമാനം കുറഞ്ഞതായും ഉണ്ണികൃഷ്ണൻ പറഞ്ഞു.