സ്ത്രീകള്‍ക്ക് ചേലാകർമം:ക്ലിനിക്​ യൂത്ത്​ ലീഗ് പ്രവര്‍ത്തകര്‍ പൂട്ടിച്ചു

കോഴിക്കോട്: സ്ത്രീകള്‍ക്ക് ചേലാകർമം എന്ന പേരില്‍ ചികിത്സരീതി നടത്തുന്നു എന്ന വാര്‍ത്തയെ തുടര്‍ന്ന് വിവാദ ക്ലിനിക്​ യൂത്ത് ലീഗ് പ്രവര്‍ത്തകര്‍ അടച്ചുപൂട്ടി. സൗത്ത് ബീച്ചിലുള്ള ദാറുല്‍ ഷിഫ എന്ന സ്ഥാപനമാണ്  പൂട്ടിയത്. ബോര്‍ഡുകള്‍ പ്രവര്‍ത്തകര്‍ നീക്കംചെയ്തു. ആഫ്രിക്കയിലെ ഗോത്രവിഭാഗങ്ങളില്‍ മാത്രം കേട്ടുകേള്‍വിയുള്ള  സമ്പ്രദായം കേരളത്തില്‍ നടപ്പാക്കാന്‍ അനുവദിക്കില്ലെന്ന് മുസ്‌ലിം യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ. ഫിറോസ്​ പറഞ്ഞു. ക്ലിനിക്​ താഴിട്ടുപൂട്ടിയതിനുശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഇത്തരം സ്ഥാപനങ്ങള്‍ പൂട്ടാന്‍ യൂത്ത് ലീഗ് നേതൃത്വം കൊടുക്കും. മനുഷ്യത്വരഹിതമായ പ്രവൃത്തികള്‍ മതത്തെ കൂട്ടുപിടിച്ച് നടപ്പാക്കുന്നതിനെതിരെ അവബോധം ഉണ്ടാക്കാൻ കാമ്പയിന്‍ നടത്തും.

ചികിത്സക്ക്​ ഡോക്ടറെ സമീപിച്ച വനിത റിപ്പോര്‍ട്ടറോടാണ് പ്രാകൃതമായ ചികിത്സരീതി ഡോക്ടര്‍ നിർദേശിച്ചത്. യൂത്ത് ലീഗ് ജില്ല വൈസ് പ്രസിഡൻറ്​ കെ.എം.എ. റഷീദ്, സെക്രട്ടറി എ. ഷിജിത്ത് ഖാൻ, യു. സജീര്‍, ടി.പി.എം. ജിഷാന്‍, വി. ശിഹാബ്, ഒ.എം. നൗഷാദ്, ഷഫീഖ് അരക്കിണർ, സമീര്‍ പള്ളിക്കണ്ടി, ഒ.വി. അല്‍ത്താഫ്, ഷഫീഖ് തോപ്പയിൽ, ഇ. മുജീബ് റഹ്​മാന്‍, കുഞ്ഞിമരക്കാര്‍ മലയമ്മ, ടി. സുല്‍ഫീക്കർ, മനാഫ്, എൻ.കെ. ഹാരിസ്, അഷ്​റഫ് മുഖദാര്‍, നസീര്‍ പണിക്കര്‍റോഡ് എന്നിവർ നേതൃത്വം നല്‍കി.