എല്ലാ പനി ക്ലിനിക്കുകളും കോവിഡ് ക്ലിനിക്കുകളാകും; കോവിഡ് ചികിത്സാ മാർഗരേഖ പുതുക്കി

തിരുവനന്തപുരം: സംസ്ഥാനത്തെ കോവിഡ് ചികിത്സാ മാർഗരേഖ പുതുക്കി. എല്ലാ പനി ക്ലിനിക്കുകളും കോവിഡ്​ ക്ലിനിക്കുകളാക്കി മാറ്റും. കോവിഡുമായി ബന്ധപ്പെട്ട എല്ലാ ചികിത്സയും ഇവിടങ്ങളിൽ ലഭ്യമാക്കണം.

സംസ്ഥാനത്ത് കോവിഡ് കേസുകൾ കുതിച്ചുയരുന്ന പശ്ചാത്തലത്തിലാണ് ഈ മാസം 31 വരെ ആരോഗ്യരംഗത്ത് കോവിഡ് പ്രതിരോധ പ്രവർത്തനങ്ങൾ ഊർജിതമാക്കുക ലക്ഷ്യമിട്ട് മാർഗരേഖ പുതുക്കിയത്.

മെയ് 31 വരെ സർക്കാർ ആശുപത്രികളിൽ കോവിഡ് ചികിത്സക്ക്​ പ്രാധാന്യം നൽകാനുള്ള നിർദേശമാണ് പുതിയ മാർഗരേഖയിൽ പറയുന്നത്​. മുഴുവൻ ഗ്രാമപ്രദേശങ്ങളിലുമുള്ള പനി ക്ലിനിക്കുകൾ കോവിഡ് ക്ലിനിക്കുകളായി മാറുന്നതോടെ പ്രതിരോധ പ്രവർത്തനങ്ങൾ കൂടുതൽ പേരിലെത്തിക്കാനാകുമെന്നാണ് പ്രതീക്ഷ​.

താലൂക്ക് ആശുപത്രികളിൽ ഓക്‌സിജൻ കിടക്കകൾ ഒരുക്കും. സെമി വെന്‍റിലേറ്റർ സൗകര്യമായ ബൈപാസ് സജ്ജീകരിക്കാൻ കഴിയുന്ന ആശുപത്രികളിലെല്ലാം അത്തരം സജ്ജീകരണങ്ങൾ ഒരുക്കണം. ഓക്‌സിജൻ ക്ഷാമം പരമാവധി കുറക്കാനാണ് ഇതുവഴി ലക്ഷ്യമിടുന്നത്.

കോവിഡ് സ്​ഥിരീകരിക്കുന്ന കിടപ്പുരോഗികൾക്ക്​ അവിടെ തന്നെ ഓക്‌സിജൻ അടക്കമുള്ള അത്യാവശ്യ സാമഗ്രികൾ എത്തിക്കാൻ നിർദേശം നൽകി. പ്രദേശങ്ങളിലെ ആരോഗ്യ പ്രവർത്തകരാണ്​ ഇതിനുള്ള ക്രമീകരണങ്ങൾ നടത്തേണ്ടത്​. മറ്റ്​ രോഗികൾക്ക് പ്രാധാന്യത്തിനനുസരിച്ചു മാത്രം സർക്കാർ ആശുപത്രികളിൽ ചികിത്സ നൽകിയാൽ മതിയെന്നും നിർദേശമുണ്ട്.

മേയ്​ 31 വരെ ഗുരുതരമായ സ്ഥിതിയിലൂടെയായിരിക്കും സംസ്ഥാനം കടന്നുപോകുക എന്ന വിലയിരുത്തലിന്‍റെ അടിസ്​ഥാനത്തിലാണ്​ ഗ്രാമപ്രദേശങ്ങളിലെ ജനങ്ങൾക്ക്​ ഉപകാരപ്രദമാകുന്ന രീതിയിൽ കോവിഡ് ചികിത്സാ മാർഗരേഖ പുതുക്കിയത്.