തൊഴിൽദിനങ്ങൾ കുറവ്​ വിമാനത്താവളത്തിലെ കരാർ ജീവനക്കാർ പ്രതിസന്ധിയിൽ

നെടുമ്പാശ്ശേരി: ലോക്ഡൗൺ നീളുേമ്പാൾ കൊച്ചി രാജ്യാന്തര വിമാനത്താവളത്തിലെ കരാർ ജീവനക്കാർക്ക് തൊഴിൽദിനങ്ങൾ കുറയുന്നു. ശുചീകരണ, ഗ്രൗണ്ട് ഹാൻഡ്​ലിങ്​, എൻജിനിയറിങ്​, മെക്കാനിക്കൽ വിഭാഗങ്ങളിലായുള്ള അയ്യായിരത്തോളം തൊഴിലാളികളാണ് വിഷമവൃത്തത്തിലായത്.

രാജ്യാന്തര വിമാന സർവിസ്​ ഇല്ലാതായതോടെ 2020 ഏപ്രിൽ മുതൽ തൊഴിൽദിനങ്ങൾ വെട്ടിച്ചുരുക്കി. പലർക്കും മാസത്തിൽ 10 ദിവസംപോലും തൊഴിൽ ലഭിക്കുന്നില്ല. 15,000 രൂപ വരെ ശമ്പളം ലഭിച്ചിരുന്നവർ ഇപ്പോൾ 3000 രൂപകൊണ്ട് തൃപ്തിപ്പെടേണ്ടിവരുകയാണ്. ഷെഡ്യൂൾഡ്‌ വിമാനങ്ങൾ പൂർണമായി സർവിസ്​ ആരംഭിച്ചാൽ മാത്രമേ പഴയതുപോലെ തൊഴിൽ ലഭിക്കൂ. വിമാനത്താവള കമ്പനിയും നഷ്​ടത്തിലാണെങ്കിലും കരാറുകാർക്ക് പണം നൽകുന്നുണ്ട്. അതിനാലാണ് കുറച്ചുദിവസമെങ്കിലും തൊഴിൽ ലഭിക്കുന്നത്.

തൊഴിലാളികളിലേറെയും വിമാനത്താവളത്തിനായി കുടിയൊഴിഞ്ഞവരാണ്. മറ്റ് ജില്ലകളിൽനിന്നുള്ളവരുമുണ്ട്. ഇവർക്ക് വാടക നൽകാനോ ഭക്ഷണത്തിനോപോലും തുക ലഭിക്കുന്നില്ല. താൽക്കാലികമായി ജോലിയിൽനിന്ന്​ വിട്ടുപോയാൽ തൊഴിൽ നഷ്​ടപ്പെടുന്ന സാഹചര്യവുമുണ്ടാകും. ഒന്നാം ലോക്ഡൗൺകാലത്ത് മൂന്നുമാസം പൂർണ ശമ്പളം നൽകാൻ കേന്ദ്ര തൊഴിൽ മന്ത്രാലയം നിർദേശിച്ചെങ്കിലും ലഭ്യമായില്ലെന്ന് സിവിൽ ഏവിയേഷൻ കോൺഗ്രസ് പ്രസിഡൻറ്​ വി.പി. ജോർജ് പറഞ്ഞു.

സിയാലിന് കീഴിൽ 550 ജീവനക്കാരോളമുണ്ട്​. ഇവർക്ക് ഇതുവരെ തൊഴിൽ ദിനങ്ങളോ ശമ്പളമോ വെട്ടിക്കുറച്ചിട്ടില്ല. എന്നാൽ, രണ്ടുമാസത്തിനുള്ളിൽ പ്രതിസന്ധി പരിഹരിക്കപ്പെട്ടില്ലെങ്കിൽ ശമ്പളം കുറക്കേണ്ടിവരുമെന്ന് ഉന്നത ഉദ്യോഗസ്ഥർ ചൂണ്ടിക്കാട്ടുന്നു.

വിമാനത്താവളത്തോട് ചേർന്ന ഹോട്ടലുകളിലും ജീവനക്കാരെ താൽക്കാലികമായി കുറച്ചിരിക്കുകയാണ്. യാത്രക്കാർ കുറഞ്ഞതോടെ പ്രീ പെയ്‌ഡ്‌ ടാക്സിക്കാർക്ക്​ എല്ലാ ദിവസവും ഓട്ടം കിട്ടുന്നില്ല. വാഹനങ്ങളുടെ സി.സി അടക്കുന്നതും മുടങ്ങിയിരിക്കുകയാണ്.