പിഴയിടാൻ മുന്നിൽ, പിരിക്കാൻ പിന്നിൽ

തിരുവനന്തപുരം: ഗതാഗതക്കുറ്റങ്ങൾക്ക്​ പിഴ ചുമത്തുന്നതിൽ മുന്നിലാണെങ്കിലും പിഴത്തുക പിരിച്ചെടുക്കുന്നതിൽ മോട്ടോർ വാഹനവകുപ്പിന്​ മെല്ലെപ്പോക്ക്​. 2023 നവംബർ ഒന്നു മുതൽ 2024 സെപ്​റ്റംബർ 30 വരെയുള്ള കണക്ക്​ പ്രകാരം നാനൂറ് കോടിയിലധികം രൂപ ഇനിയും സർക്കാർ ഖജനാവിൽ എത്തിയില്ല.

മോട്ടോർ വാഹനവകുപ്പിന്‍റെ പ്രധാന വരുമാനം വാഹന സേവനങ്ങളുമായി ബന്ധപ്പെട്ട ഫീസും പിഴ വരവുമാണ്​. എ.​​​ഐ കാമറ വഴിയും അല്ലാതെയും പിഴ ചുമത്തുമെങ്കിലും വാഹനങ്ങൾ ​ മോട്ടോർ വാഹനവകുപ്പ്​ ഓഫിസുകളിൽ സേവനത്തിനെത്തു​മ്പോഴാണ്​ പിഴയടപ്പിക്കുന്നത്​. ഫലത്തിൽ പിഴത്തുക കടലാസിൽ മാത്രമാകും.

വാഹനങ്ങളുടെ എണ്ണത്തിൽ രാജ്യത്ത്​ 10ാം സ്ഥാനത്താണെങ്കിലും ഗതാഗതക്കുറ്റങ്ങൾക്ക്​ പിഴയിടുന്നതിൽ കേരളം രണ്ടാമതാണെന്നാണ്​ കണക്കുകൾ. കേരളത്തില ഇ-ചലാൻ സംവിധാനം നടപ്പാക്കിത്തുടങ്ങിയത് 2020 മുതലാണ്​​. എ.ഐ കാമറകൾ കൂടി പ്രവർത്തിച്ച്​ തുടങ്ങിയതോടെ ഡിജിറ്റലായുള്ള പിഴചുമത്തൽ വേഗത്തിലായി. എ.ഐ കാമറകൾ ചലാൻ സൃഷ്​ടിക്കുമെങ്കിലും ഇവ വാഹന ഉടമക്ക്​ തപാൽ വഴി നോട്ടീസ്​ ആക്കി അയക്കാനുള്ള സംവിധാനം നിശ്ചലമാണ്​. ലക്ഷക്കണക്കിന്​ നോട്ടീസുകൾ കെട്ടിക്കിടക്കുകയാണ്​.