അത്​ ഹവാല പണമെങ്കിൽ സർക്കാർ പിടിച്ചെടുക്ക​ട്ടെ -ഫിറോസ്​ ക​ുന്നംപറമ്പിൽ

കോഴിക്കോട്​: അമ്മയുടെ കരള്‍മാറ്റ ചികിത്സക്ക്​ സഹായമായി ലഭിച്ച തുകയുടെ പങ്ക് ആവശ്യപ്പെട്ട് സന്നദ്ധപ്രവര്‍ത്തകര്‍ ഭീഷണിപ്പെടുത്തുന്നുവെന്ന പെണ്‍കുട്ടിയുടെ പരാതിയില്‍ കേസെടുത്തതിന്​ പിന്നാലെ പ്രതികരണവുമായി ഫിറോസ്​ കുന്നംപറമ്പിൽ. പെൺകുട്ടിയുടെ അക്കൗണ്ടിലേക്ക്​ തുക വന്നതിന്​ പിറകിൽ ഹവാല ഇടപാടാണെന്ന ആരോപണം ഉയർന്നിരുന്നു. ഇതിനെതിരെയാണ്​ ഫിറോസ്​ ഫേസ്​ബുക്കിൽ പ്രതികരിച്ചത്​. 

വർഷയുടെ അമ്മയുടെ ചികിത്സക്കായി അവരുടെ അക്കൗണ്ടിൽ വന്ന പണം ഹവാലയാണെങ്കിൽ വർഷയുടെയും അമ്മയുടെയും അക്കൗണ്ടുകൾ മരവിപ്പിക്കുകയും അതിൽ വന്ന മുഴുവൻ സംഖ്യയും സർക്കാർ കണ്ടുകെട്ടുകയും ചെയ്യണമെന്ന്​ ഫിറോസ്​ ആവശ്യപ്പെട്ടു. 

കഴിഞ്ഞദിവസമാണ്​ ഫിറോസ് കുന്നംപറമ്പിൽ, സാജന്‍ കേച്ചേരി, സലാം, ഷാഹിദ് എന്നിവര്‍ക്കെതിരെ ചേരാനല്ലൂര്‍ പൊലീസ്​​ കേസെടുത്തത്. ഭീഷണിപ്പെടുത്തിയതിനും സമൂഹമാധ്യമങ്ങളിലൂടെ അപമാനിച്ചതിനുമാണ്​ കേസ്.

ജൂണ്‍ 24നാണ് അമ്മയുടെ ശസ്ത്രക്രിയക്ക്​ സഹായം അഭ്യർഥിച്ച് തളിപ്പറമ്പ് സ്വദേശിനി വർഷ ഫേസ്​ബുക്കില്‍ ലൈവില്‍ എത്തുന്നത്. പിന്നീട്​ വര്‍ഷക്ക്​ സഹായവുമായി തൃശൂര്‍ സ്വദേശി സാജന്‍ കേച്ചേരിയും എത്തി. സമൂഹമാധ്യമങ്ങളിൽ വ്യാപകമായി പ്രചരിച്ചതോടെ 1.35 കോടി രൂപയോളമാണ്​ വർഷക്ക് ലഭിച്ചത്. ഫിറോസ്​ കുന്നംപറമ്പിൽ ഉൾപ്പെടെ സഹായാഭ്യർഥന ഷെയർ ചെയ്​തിരുന്നു. 

പിന്നീട്​ ലഭിച്ച പണത്തി​​​​​​െൻറ പേരിൽ ചിലർ തന്നെ ഭീഷണിപ്പെടുത്തുകയാണെന്നു പറഞ്ഞ്​ വർഷ ഫേസ്​ബുക്കിൽ എത്തി. അമ്മയുടെ ചികിത്സക്ക്​ ലഭിച്ച തുകയിൽനിന്ന്​ അവർ ആവശ്യപ്പെടുന്നവർക്ക് പണം നൽകണമെന്നാണ് പറയുന്നത്. ഒട്ടേറെപ്പേർ ഭീഷണിപ്പെടുത്തുന്നുണ്ട്. അമ്മയുടെ ആദ്യഘട്ട പരിശോധനകൾ പോലും കഴിഞ്ഞിട്ടില്ല. 

ചികിത്സക്ക്​ ഇനിയും മൂന്നുമാസത്തോളം കൊച്ചിയിൽതന്നെ തുടരേണ്ടതുണ്ട്. തനിക്ക് ലഭിച്ചതിൽനിന്ന്​ ഗോപിക എന്ന കുട്ടിയുടെ ചികിത്സക്ക് ആവശ്യമായ പണം നൽകിയിരുന്നു. ഗോപിക ഇപ്പോൾ സുഖം പ്രാപിച്ചുവരുകയാണ്. ത​​​​​​​െൻറ അമ്മയുടെ ചികിത്സക്ക് ഇനിയും പണം ആവശ്യമുണ്ട്. ഈ അവസരത്തിലാണ് ലഭിച്ച പണം അവർ പറയുന്നവർക്ക് നൽകണമെന്ന് ആവശ്യപ്പെട്ട് ഒരുകൂട്ടരുടെ കടന്നുവരവെന്നും വർഷയുടെ പരാതിയിൽ പറയുന്നു.

ഫിറോസി​​​​​​െൻറ ഫേസ്​ബുക്ക്​ പോസ്​റ്റ്​:
വർഷയുടെ അമ്മയക്ക് ചികിത്സക്കായി അവരുടെ അക്കൗണ്ടിൽ വന്നിരുന്ന സംഖ്യ ഹവാല പണമാണെങ്കിൽ വർഷയുടെയും അമ്മയുടെയും അക്കൗണ്ടുകൾ മരവിപ്പിക്കുകയും അതിൽ വന്ന മുഴുവൻ സംഖ്യയും സർക്കാർ കണ്ടു കെട്ടുകയും ചെയ്യണം.

ചികിത്സക്കായി വിനിയോഗിച്ച പണവും ഹവാല പണമാണെങ്കിൽ ആ പണം എത്രയും പെട്ടന്ന് സർക്കാർ തിരിച്ച് പിടിക്കണം. ഹവാലക്കാരും ചാരിറ്റിക്കാരും വർഷയും തമ്മിൽ കൂടിയാലോചിച്ചാണ് ഇത്രയും വലിയ സംഖ്യ അമ്മയുടെയും വർഷയുടെയും അക്കൗണ്ടിലേക്ക്​ എത്തിച്ചതെങ്കിൽ ഈ ഇടപാടിൽ വർഷയുടെ പങ്കും പുറത്ത് കൊണ്ടുവരേണ്ടതുണ്ട്. അവരെയും പ്രതിചേർത്ത് കേസ് എടുക്കണം